Nafnið Greta Thun­berg verður skrá­sett vöru­merki

Sænski loftslagsaðgerðasinninn Greta Thunberg hefur sóst eftir að skrásetja nafnið sitt og fleira sem vörumerki. Segir hún það nauðsynlegt til að „vernda hreyfinguna“ og koma í veg fyrir að hún verði misnotuð í viðskiptalegum tilgangi.

Thunberg greindi frá málinu á Instagram þar sem hún segir ennfremur að búið sé að koma upp sérstökum sjóði til að tryggja gegnsæi fjármögnunar hreyfingarinnar.

Thunberg lét bæði skrásetja nafnið sitt og vörumerkin og slagorðin „Föstudagar fyrir framtíðina“ (e. Fridays for Future) og „Skólaverkfall fyrir loftslagið“ (s. Skolstrejk för klimatet).

Thunberg segir að bæði hún og aðrir í loftslagsverkfallshreyfingunni hafi engan áhuga á vörumerkjum en að því miður sé þetta nauðsynlegt. Mýmörg dæmi séu um að nafn hennar og slagorðin hafi verið notuð í viðskiptalegum tilgangi, án hennar samþykkis.

„Föstudagar fyrir framtíðina er alþjóðleg hreyfing sem ég stofnaði. Hún tilheyrir hverjum þeim sem tekur þátt í henni, sér í lagi ungu fólki. Hún getur – og má – ekki vera notuð af einstaklingum eða í viðskiptalegum tilgangi.“