Grindvíkingar gantast með hugsanlegt eldgos
„Nei, það er ekki byrjað að gjósa. Við erum pollróleg. Þýðir ekkert að stressa sig á þessu. Við erum ekkert að fara að stjórna þessu,“ segir Grindvíkingurinn Jón Gauti Dagbjartsson sem titlar sig strandveiðihetju í símaskránni.
Áframhaldandi landris er rétt vestan við fjallið Þorbjörn á Reykjanesi. Bæjarfelli Grindvíkinga. Þetta sýna nýjar mælingar úr GPS-mælum Veðurstofu Íslands. Risið er á sama hraða og sagt var frá í gær, 3-4 millimetrar á dag, sem er óvenjulega hratt. Vísindamenn segja kvikusöfnun undir svæðinu við fjallið sem gæti verið undanfari eldgoss.
Grindvíkingar sitja á bombu með emmi
Vísir ákvað að taka púlsinn á Grindvíkingum og heyrði í Jóni Gauta en það er ekki á honum að heyra að púlsinn sé hár á þeim bænum. Hann er reyndar pollrólegur og leikur við hvurn sinn fingur. Og var meira í að róa órólegan blaðamanninn vegna jarðhræringanna en öfugt.
„Ég held að það hafi allir sofið rosalega vel. Kannski ekki að marka mig. Ég er of vitlaus til að vera hræddur. Ef eitthvað fer í gang þá tökum við því bara. Það þýðir ekkert að hafa áhyggjur af því. Flýtur meðan sekkur ekki. Það er bara þannig.“
Já, einmitt. Jón Gauti sér um Olís í Grindavík en á ásamt bræðrum sínum handfærabát og kallar sig því strandveiðihetju með góðri samvisku. Annars olíumálaráðherra Grindavíkur. Grindvíkingar búa á eldvirku svæði.
„Já. Við sitjum á bombu hérna. Enda er bomba að búa hérna. Þetta er æðislegt. Nema þetta er ekki bomba eins og hjá Bubba, þessi bomba er með emmi. Hér ríkir bara kátína. Við náðum að halda þorrablótið um helgina og þá má þetta bara fara.“
Í Blá lóninu býst fólk við að jörðin opnist undir þeim
Með öðrum orðum, ef marka má hljóðið í Jóni Gauta, þá eru Grindvíkingar pollrólegir.
„Allir tiltölulega slakir,“ segir Gauti en segir þó að það hljóti einhverjum að líða illa vegna þessara fregna af jarðhræringum á svæðinu.
„Fólk sem vinnur þarna uppi í Bláa lóni reiknar með því að jörðin opnist undan þeim. En almennt, við sem erum sunnan Þorbjarnar, við erum spakir yfir þessu,“ segir Gauti – ekkert annað sé í stöðunni en brosa og brosa nógu mikið.
„Menn eru ekki að fara á taugum.
Það er íbúafundur í dag, ætli maður þurfi ekki að henda einhverjum tveimur bolum í tösku, vera klár og svo er bara að keyra nógu hratt.
Hann er klukkan fjögur í íþróttasvæðinu. Nema ef verður byrjað að gjósa, þá verður þetta haldið í Þorlákshöfn. Það er heitt undir okkur, sumir héldu að það væri heitt undir körfuboltaþjálfaranum um daginn og nú er heitt undir okkur öllum. Það er bara þannig.“
Tengdar fréttir
Mæling gervitungls skýrir áhyggjur manna af Grindavík og Bláa lóninu
Orkuverið í Svartsengi og Bláa lónið eru inni á rauða blettinum og byggðin í Grindavík í jaðrinum á mynd sem unnin er úr gögnum frá gervitungli.
Versta sviðsmynd gerir ráð fyrir hraungosi sem yrði þó minna en Holuhraun
Magnús Tumi Guðmundsson jarðeðlisfræðingur segir líklegast að landrisið rétt fyrir vestan Þorbjörn stafi af kvikuhreyfingum.
Bæjarstjóri Grindavíkur: „Menn vilja vera viðbúnir hinu versta“
Fannar Jónasson segir að þó að menn voni það besta þá verði yfirvöld að vera viðbúin hinu versta, en óvissustigi hefur verið lýst yfir vegna mögulegrar kvikusöfnunar undir Þorbirni.
Óvissustigi lýst yfir vegna mögulegrar kvikusöfnunar við fjallið Þorbjörn
Landris hefur mælst frá 21. janúar og virðist miðja þess vera á Reykjanessskaganum rétt vestan við fjallið Þorbjörn.
Almannavarnakerfið samræmir viðbragð vegna óvissustigsins
Búið er að slípa til viðbragð almannavarnakerfisins í heild sinni að sögn upplýsingafulltrúa hjá Landsbjörg. Búið sé að fara yfir helstu verkferla ef til viðbragðs kemur.
