Lífið

Vegan­istur: „Þetta snýst ekki um að vera full­kominn“

Hallgerður Kolbrún E. Jónsdóttir skrifar
Systurnar Helga María og Júlía Sif halda úti uppskriftasíðunni Veganistur.
Systurnar Helga María og Júlía Sif halda úti uppskriftasíðunni Veganistur. instagram/skjáskot

Systurnar Helga María og Júlía Sif Ragnarsdætur eru báðar grænkerar, eða vegan, og halda úti blogginu Veganistur. Þær kynntust vegan lífsstílnum fyrir átta árum fyrir algjöra tilviljun. Lífsstíllinn heillaði þær strax og fljótlega opnuðu þær uppskriftasíðu í þeim tilgangi að deila uppskriftum og upplýsingum um vegan lífsstíl.

„Manneskja sem er vegan reynir eftir fremsta megni að forðast að nota dýraafurðir í daglegu lífi, í mataræði, afþreyingu og fatnaði. Maður fer ekki út í þær öfgar að neita sér um lyf og annað sem maður þarf á að halda. Þetta snýst ekki um að vera fullkominn heldur að nota ekki dýraafurðirnar þegar maður þarf þess ekki,“ segir Helga María en þær systur voru heimsóttar í Íslandi í dag nú á dögunum.

 
 
 
View this post on Instagram

2019⁣ Þetta ár hefur kennt okkur systrum margt. Mest af öllu að trúa á okkur sjálfar og hugmyndirnar okkar. Við höfum lært að leggja harðar af okkur en við höfðum hugmynd um að við gætum og komist að því að við vinnum svakalega vel saman þegar við ætlum okkur það. Þegar árið hófst höfðum við ekki hugmynd um hvað væri framundan hjá Veganistum. Okkur hafði lengi langað að skrifa bók en búandi í sitthvoru landi, báðar í námi, þótti okkur það hæpið að við gætum farið af stað í það verkefni á næstunni. Þegar yndislegu stelpurnar hjá @bjortutgafa höfðu samband við okkur fylltumst við krafti og fundum að nú væri akkúrat rétti tíminn. ⁣ Ég (Helga) flutti til Íslands yfir sumarið og við hófumst handa við að prufukeyra uppskriftir, mynda þær allar og skrifa sjálfa bókina. Allt sumarið leið okkur eins og við næðum þessu ekki en við fundum einhvern drifkraft í okkur sem gerði það að verkum að það var ekkert annað í stöðunni en að klára þetta og leggja okkur allar fram við að gera það eins vel og við gætum. Það var ekki auðvelt. Það var í raun mjög erfitt og ekkert svakalega gaman alltaf. En það hefur fyllt okkur styrk sem er ómetanlegur. Við höfum þroskast helling á árinu, lært að trúa á okkur og lært að hvetja hvora aðra þegar við byrjum að efast um eigin getu. Við erum lánsamar að geta gert þetta saman. ⁣ En ekkert af þessu hefði gerst ef ekki væri fyrir ykkur. Það er vegna ykkar sem lesið bloggið, eldið uppskriftirnar okkar og sendið okkur falleg skilaboð að bókin er til. Bókin er eins mikið ykkar og hún er okkar og við viljum að þið vitið hversu þakklátar við erum. Við hlökkum til ársins 2020 og þeirra ævintýra sem eru framundan!

A post shared by Veganistur.is (@veganistur.is) on

Þær systur hafa lengi haft áhuga á matargerð og segist Júlía hafa haft hann allt frá því hún var krakki. „Ég er búin að hafa áhuga á matargerð frá því ég var pínulítil og ætlaði alltaf að verða kokkur. Horfði á Jóa Fel þegar ég var sex ára með stjörnur í augunum og var alltaf inni í eldhúsi að fylgjast með matargerð og hafði mikinn áhuga,“ segir Júlía.

Systurnar hafa verið vegan frá árunum 2011 og 2012. stöð 2

Þær segja þó að áhuginn hafi kviknað hjá Helgu eftir að hún hafi orðið vegan. Hún hafi lært að elda þá og farið úr því að borða grillaðar samlokur í það að læra að elda. Þær kynntust vegan lífsstíl árin 2011 og 2012 og var það Helga sem byrjaði að prófa sig áfram og Júlía fylgdi fljótt á eftir.

Prófaði vegan mataræði heilsunnar vegna

„Það byrjaði svoleiðis hjá mér að ég eiginlega sá eitthvað vídeó sem mér fannst áhugavert um stelpu sem hafði verið mikið veik og ég hafði verið mikið veik eftir einkyrningssótt. Hún hafði orðið vegan og heilsan batnað og ég ákvað bara að prófa og heilsan batnaði,“ segir Helga. „Mér fannst þetta svo spennandi að ég leit aldrei til baka.“

„Tæpu ári seinna flutti ég til Helgu og þá langaði mig svolítið að prófa að vera með. Við bjuggum þrjú saman sem vorum alveg vegan og elduðum mikið saman.“



Þær systur sýndu áhorfendum í Íslandi í dag hvernig þær búa til vegan rjómapasta frá grunni og má finna uppskriftina hér eða í nýútgefinni uppskriftabók þeirra. Þær sýna meira að segja hvernig búa má til matreiðslurjóma úr kasjúhnetum frá grunni.


Þær segja að ekki sé erfitt að finna vegan vörur á markaði hér á Íslandi og úrval fari batnandi með hverju árinu sem líður. „Það er alls ekki erfitt [að finna vegan vörur], sérstaklega ekki í dag. Sérstaklega mjólkurvörurnar eru orðnar mjög aðgengilegar,“ segir Júlía. „Það er enn þá velta á þessum vörum og sumar eru betri en aðrar þannig að við vildum svolítið vinna með það í bókinni að gera mikið sjálfar og hafa tímalausar uppskriftir þannig að það væru ekki einhver hráefni sem fást ekki eftir nokkur ár.“

Lykill að veganvæða mat sem fólk er vant

Þær segja sniðugt fyrir fólk sem vill tileinka sér vegan mataræði að veganvæða rétti sem það er vant að elda.

„Mér finnst oft sniðugt að segja fólki að byrja bara á að taka rétti sem það þekkir og er vant að borða og skipta út hráefnunum. Gera mat sem það er vant að borða og þekkir af því að það er orðið ótrúlega auðvelt í dag að skipta bara út dýraafurðunum.“


„Við erum svo vanaföst og viljum bara borða það sem við elskum og ef fólk heldur að það þurfi bara að umturna lífi sínu til að gerast vegan og byrja að borða eitthvað allt annað þá hljómar þetta kannski ekkert svakalega spennandi en í rauninni er það nefnilega þannig að maður getur bara haldið áfram að borða sína uppáhalds rétti, breytt þeim aðeins og þeir eru ekkert síðri á bragðið,“ segir Helga.

Aðallega fjölskyldan sem hafði sterkar skoðanir

Þær systur segjast auðvitað hafa fengið ýmsar athugasemdir og heyrt ýmsar skoðanir um lífsstíl þeirra en það hafi sérstaklega verið til að byrja með.

„Það var mikið fyrst, aðallega samt í fjölskylduboðunum og þannig. Við fáum ekki mikið eitthvað svona fólk út í bæ að segja eitthvað en það eru kannski helst manns nánustu. Það hefur samt minnkað mikið,“ segir Júlía.

Rjómapastað sem systurnar elduðu í Íslandi í dag. stöð 2

„Fyrst fékk maður öll þessi klassísku komment.“

„Það er einhvern vegin alltaf þegar maður fer inn á nýjan stað, eins og þegar ég byrjaði fyrst í framhaldsskóla og svo í háskóla og þegar maður byrjar í nýrri vinnu og svoleiðis þá veit maður að þetta umræðuefni mun koma, maður mun þurfa að taka umræðuna en fólk er, sérstaklega í dag, orðið mjög jákvætt fyrir þessu. Það þekkja allir þetta orð núna sem fólk gerði ekki áður fyrr og maður þurfti að fara í miklar útskýringar oft.“

Horfa má á þáttinn í heild sinni í spilaranum hér að neðan.


Tengdar fréttir

Vegan mest viðeigandi á jólum

Guðrún Sóley Gestsdóttir segir að það sé auðvelt og skemmtilegt að venja sig á að borða vegan fæði á jólum og það eigi aldrei betur við, því bæði veganismi og jólin snúist um kærleika, frið og samkennd.

Eggaldin í staðinn fyrir síld

Helga María og Júlía Sif Ragnarsdætur halda úti matarblogginu Veganistur. Eins og nafnið gefur til kynna eru þær vegan og borða hvorki dýr né dýraafurðir. Þær segja það síður en svo þýða verri mat eða eintóma hollustu.

Eggjalaus jólabakstur er leikur einn

Egg hafa verið mikið í umræðunni og margt fólk íhugar nú að hætta neyslu eggja eftir aukið tal um aðbúnað hænsna í eggjabúum landsins. En hvernig kemst maður í gegnum jólabaksturinn án eggja? Vala Árnadóttir segir það vera ekkert mál.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.