Erlent

Óttast að skipið gæti brotnað í tvennt

Andri Eysteinsson skrifar
Skipið, MV Wakashio, strandaði á kóralrifi í Indlandshafi þann 25. júlí síðastliðinn og síðan hafa mörg tonn af olíu lekið úr skipinu.
Skipið, MV Wakashio, strandaði á kóralrifi í Indlandshafi þann 25. júlí síðastliðinn og síðan hafa mörg tonn af olíu lekið úr skipinu. AP

Yfirvöld eyríkisins Máritíus segjast óttast að flak flutningaskipsins MV Wakashio gæti brotnað í tvennt en stórar og miklar sprungur hafa myndast á ytra byrði þess.

Skipið sem skráð er í Panama strandaði á kóralrifi í Indlandshafi 25. Júlí síðastliðinn og mörg tonn af olíu lekið úr skipinu síðan.

Forsætisráðherra Máritíus segir að þegar hafi yfir fimm hundruð tonnum verið dælt úr hafinu en varaði við því að stjórnvöld væru að undirbúa sig fyrir hið versta.

Hið versta í þessu máli væri að olían myndi valda stórfelldum skemmdum á stórbrotnum Kóralrifjum sem finna má undan ströndum Máritíusar. BBC greinir frá því að margir ferðist gagngert til landsins til þess að kafa og skoða rifin en ferðaþjónusta er ein mikilvægasta atvinnugrein landsins.

Sjálfboðaliðar hafa unnið hörðum höndum af því að hreinsa strandir þar sem olíu hefur skolað á land, þvert tilmæli yfirvalda sem báðu landsmenn um að eftirláta fagmönnum hreinsunarstörf.

Forstjóri japanska skipafélagsins Mitsui OSK Lines, sem gerir MV Wakashio út, hefur beðist afsökunar á slysinu og segir að vegna öldugangs hefðu aðgerðir skipverja, sem reyndu að hefta útbreiðslu olíunnar, mistekist. Talið er að yfir þúsund tonn af olíu hafi lekið í hafið en skipið bar 3 þúsund tonn til viðbótar þegar það strandaði.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.