Íslenski boltinn

Fresta þarf þremur umferðum í Pepsi Max-deildunum

Ingvi Þór Sæmundsson skrifar
Úr leik í Pepsi Max-deild kvenna í sumar.
Úr leik í Pepsi Max-deild kvenna í sumar. vísir/vilhelm

Fresta þarf tveimur umferðum í Pepsi Max-deild karla og einni í Pepsi Max-deild kvenna vegna tilmæla sóttvarnayfirvalda um að fresta íþróttakappleikjum fullorðinna um viku.

Á blaðamannafundi ríkisstjórnarinnar og sóttvarnayfirvalda í dag biðlaði Víðir Reynisson yfirlögregluþjónn til íþróttahreyfingarinnar að fresta íþróttakappleikjum til 10. ágúst.Er þar átt við kappleiki iðkenda sem eru fæddir árið 2000 eða fyrr.

Tíunda umferð Pepsi Max-deildar karla átti að fara fram þriðjudaginn 4. ágúst og miðvikudaginn 5. ágúst. Fimmtudaginn 6. ágúst áttu allir fimm leikirnir í 9. umferð Pepsi Max-deildar kvenna að fara fram.

Sunnudaginn 9. ágúst voru fimm leikir í 10. umferð Pepsi Max-deildar karla á dagskrá og einn á mánudeginum þegar leikir mega fara aftur fram ef allt gengur að óskum.

Á þessu tímabili, 1.-10. ágúst, áttu tvær umferðir í Lengjudeild karla og ein í Lengjudeild kvenna að fara fram.

Sjö leikir eru á dagskrá í sextán liða úrslitum Mjólkurbikars karla í kvöld eins og staðan er núna. Einn leikur átti að vera á morgun, viðureign Vals og ÍA á Hlíðarenda.

Starfsfólk KSÍ fundar núna um næstu skref vegna tilmæla sóttvarnaryfirvalda. „Við eigum eftir að fara betur yfir stöðuna og skoða hvað þetta þýðir fyrir okkur. Við reynum að meta þetta eins vel og við getum og svo verða teknar þær ákvarðanir sem þarf að taka,“ segir Klara Bjartmarz, framkvæmdastjóri KSÍ, í samtali við Vísi.

Ekki er mikið svigrúm til að fresta leikjum, sérstaklega í Pepsi Max-deildunum þar sem þegar hefur þurft að fresta leikjum vegna þess að nokkur lið þurftu að fara í sóttkví.

Karlalið Stjörnunnar var eitt þeirra sem þurfti að fara í sóttkví. Dagskrá Garðbæinga riðlaðist mikið vegna þess og liðið átti t.a.m. að spila sjö deildarleiki í ágúst.

Pepsi Max-deild kvenna á að ljúka 17. október og Pepsi Max-deild karla 31. október.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.