Líkir Ísaki við Batman: Ofurhetja án ofurkrafta

„Í framtíðinni getum við sagt barnabörnunum okkar að við sáum fyrsta mark Ísaks Bergmann Jóhannessonar í sænsku úrvalsdeildinni,“ skrifaði Robert Laul, blaðamaður á Aftonbladet, í umfjöllun sinni um 3-1 sigur Norrköping á Göteborg í gær.

Umræddur Ísak kom Norrköping yfir með góðu skoti á 26. mínútu. Það var hans fyrsta mark í sænsku úrvalsdeildinni. Ísak lagði svo upp annað mark Norrköping fyrir Lars Gerson.

Ísak hefur verið í byrjunarliðinu í síðustu þremur deildarleikjum Norrköping. Í þeim hefur þessi sautján ára Skagastrákur skorað eitt mark og lagt upp þrjú.

„Það virðast ekki vera nein takmörk fyrir því hversu góður hann getur orðið,“ sagði áðurnefndur Robert Laul þegar blaðamaður Vísis sló á þráðinn til hans í morgun.

Hann er svo ungur en spilar eins og fullþroska fótboltamaður. Eftir leikinn í gær sagði þjálfari Norrköping [Jens Gustafsson] að Ísak eins og hann byggi yfir reynslu 35 ára leikmanns. Við erum eiginlega orðlaus. Við sjáum hann sem hæfileikaríkasta unga leikmanninn í sænsku deildinni. Það eru engir sænskir leikmenn sem búa yfir þessum hæfileikum.

Laul greip því næst í skemmtilega líkingu úr myndasöguheiminum. „Ísak er eins og Batman. Hann er ofurhetja án ofurkrafta,“ sagði Laul.

Farið fram úr væntingum

Ísak kom við sögu í einum leik með Norrköping í sænsku úrvalsdeildinni í fyrra. Hann spilaði talsvert á undirbúningstímabilinu og Laul segist hafa búist við því að hann gæti gert góða hluti í sumar. En kannski ekki svona góða.

„Fyrir tímabilið gerðum við lista yfir bestu ungu leikmennina í sænsku úrvalsdeildinni og hann var þar í 1. sæti. En samt gátum við ekki ímyndað okkur að hann myndi gera svona mikið, svona snemma á tímabilinu. Það kemur okkur á óvart hvað hann hefur þroskast hratt,“ sagði Laul.

Alexander Isak eini sem hægt er að líkja við Ísak

Hann segir að Ísak búi yfir miklum leikskilningi, yfirvegun og fari frábærlega með boltann.

„Það sem gerir hann svo einstakan er að hann er bara sautján ára. Og þegar þú sérð sautján ára leikmenn eiga þeir margt eftir ólært. En hann virðist ráða við allt,“ sagði Laul.

„Hann er með mikla tækni og getur gert hluti með boltann á miklum hraða. Hann getur tekið boltann með sér á fullri ferð í átt að marki andstæðinganna og sett hann í netið. Ég hef aldrei séð sautján ára leikmann gera þessa hluti, nema kannski Alexander Isak,“ sagði Laul og vísaði til sænska landsliðsframherjans sem leikur nú með Real Sociedad á Spáni.

„Hann var á þessu getustigi fyrir nokkrum árum og það er helst hann sem kemur upp í hugann þegar maður sér svona hæfileikaríkan strák. Zlatan [Ibrahimovic] var nokkru eldri þegar hann skaust fram á sjónarsviðið í sænsku úrvalsdeildinni.“

Hefur vakið athygli stærri félaga

Laul efast um að Ísak verði lengi í herbúðum Norrköping og hann hafi þegar vakið athygli stærri félaga.

„Ég get ekki ímyndað mér að hann verði mikið lengur en út sumarið. Stærri félög reyna væntanlega að fá hann því hann er einfaldlega það hæfileikaríkur,“ sagði Laul.

„Kannski vill hann vera áfram í Svíþjóð og öðlast meiri reynslu áður en hann tekur næsta skref á ferlinum. En ég er sannfærður um að stærri félög reyni að kaupa hann í sumar.“

Á toppnum öllum að óvörum

Norrköping er með fimm stiga forskot á toppi sænsku úrvalsdeildarinnar eftir sex umferðir. Laul segir að það sé óvænt staða.

„Fyrir tímabilið trúði því enginn. En þetta er mjög sérstakt tímabil. Það eru engir áhorfendur á leikjum og mörg af stóru liðunum hafa ekki náð sér á strik. Stærsti óvinur Norrköping eru þeir sjálfir. Þeir einir geta komið í veg fyrir að þeir verði meistarar,“ sagði Laul.

Norrköping hefur afar góða reynslu af íslenskum leikmönnum. Stefán Þór Þórðarson er í guðatölu hjá stuðningsmönnum félagsins, Arnór Ingvi Traustason hjálpaði Norrköping að verða sænskur meistari 2016 og nafni hans, Sigurðsson, var seldur til CSKA Moskvu eftir að hafa slegið í gegn í sænsku úrvalsdeildinni fyrir tveimur árum.

„Norrköping eru góðir með unga leikmenn. Þeir leggja mikla áherslu á að þróa leikmenn, ekki bara að vinna titla. Stefna félagsins er að gera unga leikmenn betri. Það er í þeirra DNA,“ sagði Laul að lokum.