Innlent

Hlýtt fyrir norðan í dag en snýst við á morgun

Tryggvi Páll Tryggvason skrifar
Veðurspáin fyrir allt landið á hádegi í dag.
Veðurspáin fyrir allt landið á hádegi í dag. Mynd/Veðurstofan.

Hæglætisveður verður víðast hvar á landinu í dag, hlýjast í innsveitum norðanlands. Þetta snýst þó við á morgun þegar kólnar þar, en hlýnar sunnanlands.

Þetta kemur fram í hugleiðingum veðurfræðings á vef Veðurstofu Íslands.

„Hæglætisveður verður víðast hvar á landinu í dag, en einhverjir vindstrengir verða með suðurströndinni og á Ströndum. Að mestu skýjað og stöku skúrir sunnan- og vestanlands, en annars bjartviðri. Áfram er milt loft yfir landinu, hiti allt að 18 stigum, hlýjast í innsveitum norðanlands.“

Á morgun er þó útlit fyrir norðlæga átt með kólnandi veðri norðantil á landinu, en bjartviðri og hita að sautján stigum um sunnanvert landið. Í næstu viku munu ríkja fremur hægar norðlægar eða breytilegar áttir, skýjað með köflum og lítilsháttar væta í flestum landshlutum.

Kalt verður norðan heiða, á bilinu sex til ellefu stig, en hiti gæti náð átján stigum syðra.

Veðurhorfur á landinu

Austlæg eða breytileg átt 3-8 m/s, en 8-13 með suðurströndinni. Gengur í norðan 8-13 norðvestantil eftir hádegi. Skýjað með köflum og stöku skúrir á sunnan- og vestanlands, og sums staðar þokubakkar austantil, en bjartviðri norðanlands. Hiti 10 til 18 stig, hlýjast í innsveitum fyrir norðan.

Veðurhorfur á landinu næstu daga

Á sunnudag:

Norðlæg átt, 5-10 m/s en 8-13 með austurströndinni. Bjartviðri sunnan- og vestanlands, en sums staðar dálitlar skúrir síðdegis. Hiti 12 til 17 stig. Skýjað um landið norðanvert með hita 6 til 11 stig.

Á mánudag:

Norðlæg átt, 3-10 m/s, hvassast austantil. Lítilsháttar væta á Norður- og Austurlandi með hita 6 til 10 stig, en bjartviðri sunnan heiða og úrkomulítið, og hita að 18 stigum yfir daginn.

Á þriðjudag:

Hæg breytileg átt, skýjað með köflum og líkur á skúrum í flestum landshlutum, einkum síðdegis. Hiti 8 til 15 stig.

Á miðvikudag og fimmtudag:

Útlit fyrir fremur hæga norðlæga átt. Skýjað og einhver væta norðaustanlands, en annars bjart að mestu og þurrt. Hiti frá 6 stigum við norðausturströndina, upp í 18 stig á Suður- og Vesturlandi.

Á föstudag:

Líkur á hægri vestlægri átt. Skýjað en þurrt að kalla vestantil, annars bjartviðri. Hiti breytist lítið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.