FFÍ og Icelandair funda aftur í hádeginu

Samningafundi Flugfreyjufélags Íslands og Icelandair var slitið skömmu fyrir klukkan tvö í nótt eftir um sextán tíma samningalotu.

Fundur samninganefndanna hófst klukkan hálf tíu í morgun og hefur staðið sleitulaust frá því þá. Báðar nefndir hafa lagt sig fram og uppbyggilegt samtal hefur átt sér stað í allan dag. Helsta ágreiningsefnið er starfsöryggi flugfreyja og -þjóna sem og fleiri vinnustundir fyrir sömu laun.

Fundurinn í gær átti að standa til klukkan 14:00 en lengdist töluvert og má leiða að því líkum að samninganefndirnar hafi átt viðræður sem hafi skilað einhverjum árangri því nýr fundur hefur verið boðaður á hádegi í dag.

Aðalsteinn Leifsson, ríkissáttasemjari, sagði í samtali við fréttastofu í gær að viðræðurnar væru þungar, erfiðar og flóknar. Í upphafi hafi ágreiningsefnin verið fimmtíu en að þeim hafi fækkað.

Fyrirhugað hlutafjárútboð Icelandair er 29. júní til 2. júlí og freistar flugfélagið þess að safna 29 milljörðum.