Erlent

Mótmæli næturinnar að mestu friðsamleg

Gunnar Reynir Valþórsson skrifar
„Ef þið hélduð friðinn þyrftum við ekki að mótmæla.“ Mótmælendur í Washington D.C., höfuðborg Bandaríkjanna, með skilaboð til lögreglunnar í Bandaríkjunum.
„Ef þið hélduð friðinn þyrftum við ekki að mótmæla.“ Mótmælendur í Washington D.C., höfuðborg Bandaríkjanna, með skilaboð til lögreglunnar í Bandaríkjunum. Jacquelyn Martin/AP

Mótmæli héldu áfram í nótt í Bandaríkjunum þrátt fyrir útgöngubann í fjölda borga. Að þessu sinni fóru aðgerðirnar þó að mestu friðsamlega fram en þetta er áttunda nóttin í röð þar sem fólkið mótmælir lögregluofbeldi í kjölfarið á morðinu á George Floyd í Minneapolis í Minnesota.

Þúsundir komu saman í Houston í Texas í kröfugöngu og þar voru fjölskyldumeðlimir George Floyd á meðal göngumanna.

Trump forseti hefur hótað að beita hermönnum gegn mótmælendum og um sextán hundruð slíkir hafa verið sendir til höfuðborgarinnar Washington þar sem þeir eru í viðbragðsstöðu.

Í Buffalo í New York ríki hefur kona verið ákærð fyrir að stofna lífi lögreglumanna í hættu en á mánudagsnótt ók hún bíl sínum inn í hóp þeirra og eru þrír slasaðir.

Óttast að kórónuveiran taki stökk

Sérfræðingar óttast að mótmælaaldan verði til þess að kórónuveirufaraldurinn taki kipp upp á við en AP fréttastofan greinir frá því að fjöldamótmæli hafi farið fram í öllum þeim 25 borgum í Bandaríkjunum þar sem nýsmit kórónuveirunnar hafa verið flest síðustu daga.

Því er óttast að nýjum smitum á svæðunum eigi eftir að fjölga enn meira. Nú eru staðfest smit í Bandaríkjunum 1.8 milljónir og um 106 þúsund manns hafa látið lífið af völdum Covid-19, sjúkdómsins sem veiran getur valdið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.