Björgvin minnist Robin Gibb - frábærir lagahöfundar

„Hljómsveitin Bee Gees hafði mikil áhrif á tónlistina um heim allan, mér fannst þeir æðislega góðir," segir stórsöngvarinn Björgvin Halldórsson um andlát Robin Gibb, sem lést í gær, 62 ára að aldri. Björgvin segir að andlát Robin hafi ekki komið sér á óvart, hann var orðinn mjög veikur, enda háð harðvítuga baráttu við krabbamein í lifrinni síðustu mánuði.

„Ég fylgdist vel með þessu á netinu og undir lokin gat hann ekki gert neitt annað en blikkað augunum," útskýrir Björgvin sem var næstum búinn að fá poppgoðið til þess að stíga á svið hér á landi síðustu jól. Robin afboðaði tónleikana með skömmum fyrirvara auk tíu annarra víða um Evrópu vegna veikindanna. Það munaði hinsvegar litlu að Robin hefði tekið lagið með Björgvini á árlegum jólatónleikum.

„Það var allt klappað og klárt. Við vorum búnir að ganga frá samningum og fá lagalistann í hendur, svo varð hann veikur og þurfti að aflýsa," segir Björgvin, sem missti af tækifærinu að syngja með Robin. Spurður hvort hann finni fyrir eftirsjá, svarar Björgvin einfaldlega: „Maðurinn með ljáinn gerir ekki alltaf boð á undan sér."

Maurice, bróðir Robin, lést einnig úr veikindum árið 2003, Barry Gibb, þriðji og elsti bróðirinn, er því eini eftirlifandi meðlimur hljómsveitarinnar frægu, sem Björgvin sá þó aldrei á sviði. Björgvin segir að eftir standi frábær lög einstakra tónlistarmanna. „Þeir hafa samið tónlist fyrir alla, og æðisleg lög líka. Líklega áttar fólk sig ekki alveg á því hversu mikið af frægum lögum þeir sömdu, enda sögðust þeir alltaf vera lagahöfundar," segir Björgvin en nefna má lögin Stayin' Alive, How Deep Is Your Love, Massachusetts og Night Fever.

Björgvin segir hljómsveitina Bee Gees vera eina af fimm stærstu hljómsveitum sögunnar.

Hér fyrir ofan má sjá myndband með einu frægasta lagi Bee Gees.