Landmannalaugar eins og á bílasölu

Vinnuhópur á vegum Rangárþings ytra um framtíðarskipulag Landmannalauga segir að koma þurfi bílum af svæðum.

Kom fram á síðasta fundi vinnuhópsins þar sem fulltrúar Landmótunar og VA-arkitekta mættu, að áreyrar í Landmannalaugum séu stærstu líparítáreyrar í Evrópu. Fyrirtækin voru að kynna hugmyndir sínar að deiliskipulagi á grundvelli vinningstillögu í samkeppni sem sveitarfélagið efndi til.

„Jafnframt kom fram í forskoðun þeirra að afar áberandi var hversu margir bílar voru á svæðinu og svæðið oft eins og á bílasölu. Koma þarf bílum af svæðinu og á þar til gerð stæði, annars vegar sunnan við Sólvang og hins vegar við Námskvíslina,“ segir í fundargerð Landmannalaugahópsins.

Lagt er til að breiður göngustígur tengi saman bæði svæðin og að stígur verði frá bílastæðum við Námskvísl að laugasvæðinu og skála sem Ferðafélag Íslands á og rekur á svæðinu.

Þá kom fram óska þurfi eftir því við Veðurstofu Íslands að fá frekari niðurstöður úr vatnamælingum í Laugunum vegna frekari hönnunar með tilliti til varnargarða og staðsetningar á mannvirkjum.

„Styrkja þarf gróðurvernd á svæðinu með góðum stígum og stýringu á styttri leiðum um svæðið. Byggingar eiga að vera léttar og þannig gerðar að auðvelt verði að fjarlægja þær,“ segir í umfjöllun vinnuhópsins.