Pollapönk tekur fram úr Botnleðju í plötusölu

Hljómsveitin Pollapönk er að taka fram úr Botnleðju í vinsældum ef marka má seldar plötur. Sömu meðlimir eru í báðum sveitum, þeir Heiðar og Halli.

Nýjasta plata Pollapönks, Meira pollapönk, hefur selst í um tvö þúsund eintökum, sem er svipað og jafnvel ívið meira en þrjár síðustu plötur Botnleðju. Haraldur Freyr Gíslason og Heiðar Örn Kristjánsson eru meðlimir beggja sveitanna, en Botnleðja hefur ekki starfað undanfarin sjö ár.

„Eftir að Fólk er fífl kom út varð mögulegt að skrifa diska og ég held að það sé mesta breytingin í þessu. Við vorum kannski að spila á tónleikum og vorum beðnir um að árita skrifaða diska,“ segir trommarinn Halli. Fólk er fífl kom út 1996 og seldist í 4.500 eintökum á meðan Magnyl sem kom út tveimur árum síðar seldist mun verr, í 2.000 eintökum. Plöturnar sem komu á eftir, Douglas Dakota og Iceland National Park, seldust í 1.500 til 2.000 eintökum hvor.

„Plötusala hefur dregist mikið saman síðan Botnleðja var starfandi en á móti kemur að Polla­pönkið á stærri markhóp,“ segir Halli. Hann segir vinsældir Pollapönksins ekki hafa komið sér á óvart. „Platan er meiriháttar góð og við erum að spila mikið. Þetta kemur mér ekkert á óvart en við erum gríðarlega þakklátir samt sem áður. Við trúðum alltaf á að þetta væri meiriháttar góð plata og gæti náð til margra, ekki bara barnanna.“

Heldurðu að þín verði frekar minnst sem Pollapönkara í stað Botnleðjurokkara í framtíðinni? „Það er ómögulegt að segja en ég myndi ekki fúlsa við því. Mér finnst bæði jafngott,“ segir Halli og bætir við: „Það er að koma smá Botnleðjufílingur í mig sem hefur ekki verið áður. Það getur vel verið að við gerum eitthvað á nýju ári.“

freyr@frettabladid.is