Ferðagjöfina til Íslendinga verður hægt að nálgast fyrstu vikuna í júní

Íslendingum átján ára og eldri stendur til boða fljótlega að sækja stafrænt gjafabréf til að verja í ferðaþjónustu innanlands. 1,5 milljarður króna er til skiptana á milli Íslendinga átján ára og eldri. Miðað við fjölda Íslendinga á þessum aldri, um 283 þúsund skv. upplýsingum af vef Hagstofunnar, fær hver Íslendingur um 5300 krónur í sinn hlut. Þeir sem ekki ætla að njóta gjafarinnar geta gefið öðrum gjöfina.

Stafrænu gjafabréfin eru liður í aðgerðum stjórnvalda til að veita efnahagslífinu og einkum ferðaþjónustunni viðspyrnu.

Verkefnahópur hefur unnið að útfærslu gjafabréfsins. Í honum sitja fulltrúar atvinnuvega- og nýsköpunarráðuneytis, fjármálaráðuneytis, verkefnastofu um Stafrænt Ísland, Ferðamálastofu og Samtaka ferðaþjónustunnar. Gjafabréfið hefur hlotið heitið „Ferðagjöf“.

Tillaga liggur nú fyrir um tæknilega útfærslu og er næsta skref að koma þeirri lausn í framkvæmd. Miðstöð verkefnisins verður vefurinn www.ferdalag.is sem hýsir hvatningarátak um ferðalög innanlands sem Ferðamálastofa annast.

Þar verða hlekkir til að sækja Ferðagjöfina og vistast hún þá sem strikamerki í nýju smáforriti fyrir farsíma, sem einfalt verður að nota til greiðslu hjá öllum ferðaþjónustufyrirtækjum sem skrá sig til þátttöku. Þeir sem vilja ekki hlaða slíku forriti niður, eða eiga ekki snjallsíma, munu geta greitt með kóða á netinu.

Lausnin býður upp á þann möguleika að fyrirtæki og félög gefi sínar eigin ferðagjafir, sem bætist þá við inneign viðkomandi.

Ferðaþjónustufyrirtæki þurfa að skrá sig til þátttöku og geta þá samhliða kynnt tilboð sem þau kunna að vilja bjóða upp á til að höfða til neytenda. Vonir standa til að töluvert verði um slík tilboð sem þannig auki virði inneignanna. Framboð ferðaþjónustufyrirtækja verður sömuleiðis kynnt á vefnum www.ferdalag.is.

Öll fyrirtæki í ferðaþjónustutengdum rekstri geta skráð sig til þátttöku, þ.m.t. hótel og gistiheimili, afþreyingarfyrirtæki, bílaleigur og veitingastaðir. Miðað verður við atvinnugreinaflokkun fyrirtækja og eftir atvikum rekstrarleyfi. Nákvæmari útfærsla á því verður kynnt þegar þar að kemur.

Allir einstaklingar með íslenksa kennitölu fæddir 2002 og fyrr fá göfina. Gert er ráð fyrir að einstaklingar sem sjá ekki fram á að nýta sér gjöfina geti flutt hana yfir til annars einstaklings. Stefnt er að því að Ferðagjöfin verði tilbúin til afhendingar fyrstu vikuna í júní.