Hafa ekki fengið að snúa heim

Hátt í 600 manns, sem þurftu að yfirgefa heimili sín í skyndingu í gærkvöldi af ótta við eitraðan reyk frá stórbruna við Sundahöfn, hafa ekki enn fengið að snúa til síns heima og er óvíst hvenær það verður. Fulltrúar heilbrigðisyfirvalda, lögreglu og tryggingafélaga munu meta það þegar líður á daginn. Rauði Krossinn hýsti fjölda fólks í Langholtsskóla í nótt, en aðrir gistu hjá vinum og ættingjum. Nokkrir leituðu aðstoðar á Slysadeild vegna gruns um reikeitrun, en enginn hafði þó hlotið alvarleg einkenni. Engin starfssemi er í framleiðslu- og þjónustufyrirtækjum á svæðinu og óljóst hvenær hún hefst, en talið er að víða hafi orðið miklar reykskemmdir, bæði í atvinnu- og íbúðarhúsnæði á all stóru svæði. Þá er ekkert skólahald í Laugalækjarskóla í dag og leikskólarnir Lækjarborg og Laugaborg eru lokaðir. Eldurinn kviknaði á athafnasvæði Hringrásar við Sundahöfn og varð hans vart á tíunda tímanum í gærkvöldi. Allt slökkvilið höfuðborgarsvæðisins var kallað á vettvang og aðstoð barst frá slökkviliðunum í Keflavík og á Keflavíkurflugvelli auk þess sem danskt varðskip, sem lónar útifyrir, hefur dælt sjó til slökkkviliðsmanna í nótt. Eldurinn virðist hafa kviknað í skemmu og borist í mikinn hlaða af ónýtum dekkjum, sem átti að farga, og magnaðist eldurinn skjótt. Eldurinn er mjög lífseigur í dekkjunum og þarf að kraka þau logandi úr staflanum og flytja þau á víðavang, þar sem endanlega er slökkt í þeim. Allt athafnasvæði í grennd við brunastað er lokað og Sæbraut er lokuð frá gatnamótum Kringlumýrarbrautar á Langholtsvegi og allar hliðargötur að henni eru líka lokaðar á þessu svæði. Talsverður eldur logar enn á staðnum, því slökkvistarf gengur hægt en örugglega. Búist er við að það muni standa eitthvað fram eftir degi. Vindur á að snúast til suðlægrar áttar í dag og þá ætti reykinn að leggja út á sund og hættan að líða hjá. Reiknað er með því að staðan verði endurmetin í hádeginu. Engin sprengihætta er á svæðinu, þannig að slökkviliðsmenn gátu strax ráðist að eldinum sjálfum. Eldsupptök eru ókunn, en í fljótu bragði virðist sem eldurinn hafi fyrst kviknað í skemmu á athafnasvæði Hringrásar, en þar er mikill brotajárnshaugur auk dekkjastaflans.