Samfélags-app sem einfaldar djammið

„Við félagarnir prófuðum þetta um helgina og þetta var algjör snilld,“ segir Guðmundur Sveinsson, tölvunarfræðingur hjá hugbúnaðarfyrirtækinu GlensnelG Software.

Guðmundur, eða Gumbó eins og hann er jafnan kallaður, er einn þriggja tölvunarfræðinga sem hannað hafa fyrsta samfélags-app Íslendinga fyrir snjallsíma.

Appið kallast „Djamm?“ og er hugsað til að einfalda fólki að undirbúa djammið sem er fram undan.

„Þetta virkar þannig að maður skráir sig inn með einum takka. Þá er búinn til notandi út frá þeim upplýsingum sem gefnar eru upp og svo þarf bara að bæta við vinum og svona, eins og á Facebook,“ segir Gumbó.

Notendur fá svo skilaboð í símann þegar styttist í djammið. „Við sendum tilkynningu klukkan 18 á djammdeginum, á föstudegi, laugardegi eða á virkum degi þegar það er helgidagur daginn eftir.“

Notendurnir fá meldingu í símann þar sem spurt er: „Er djamm í kvöld?“ og er spurningunni ýmist svarað játandi eða neitandi.

„Ef þú segir „já“ ertu merktur í appinu eins og þú sért að fara að djamma. Þá geturðu farið inn í appið og séð hvaða vinir þínir eru líka að fara að djamma og séð hvar þeir eru, ef fólk velur að deila með sér staðsetningunni,“ segir Gumbó og bætir við að einu sinni yfir kvöldið fái notandi meldingu ef annar vinur er í um 50 metra fjarlægð.

„Svo er hægt að senda skilaboð í spjallkerfi, þar sem skilaboðin birtast aðeins einu sinni en eyðast svo. Fólk getur því verið að senda skemmtileg skilaboð sín á milli á fylleríi sem sjást bara einu sinni.“

Appið er enn í vinnslu en forprófanir fara nú fram og segir Gumbó að öllum frjálst að skrá sig og vera með. Skráning fer fram inni á slóðinni Glensnelg.com.

Fyrsta samfélags-appið

„Djamm?“ verður fyrsta samfélags-app, eða „social app“ okkar Íslendinga.

Slík öpp njóta gríðarlegra vinsælda meðal snjallsímaeigenda. Forrit eins og Instagram, Twitter, Facebook og Snapchat teljast öll til sams konar forrita.