Berst fyrir bættum hag útigangsmanna

Ung kona sem missti vin sinn, þrjátíu og tveggja ára gamlan útigangsmann, berst fyrir því að opnað verði nýtt skýli fyrir útigangsfólk. Eftir andlát vinar hennar skrifaði hún borgarstjóra bréf, en ekkert hefur breyst.

Í gistiskýlinu við Þingholtsstræti er næturpláss fyrir tuttugu manns. Klukkan tíu á morgnana er síðan öllum vísað út.

„Útigangsmennirnir hér hafa engan stað til að geyma dótið sitt," segir Alma Rut Lindudóttir, áfengis- og forvarnaráðgjafi. „Þar er oft stolið af þeim og ég veit að margir hafa oft sofið úti því þeir vilja ekki vera inni í gistiskýlinu.

Auk gistiskýlisins býður Konukot átta konum upp á næturskjól og nokkrir gámar fyrir heimilislausa eru úti á Granda. Talið er að um hundrað manns búi á götum Reykjavíkur.

„Mér finnst að það þurfi að vera skýli sem er opið allan sólarhringinn sem fólk getur leitað í, bæði á daginn og á nóttunni, skýli sem er upphitað þannig að fólk geti setið inni að vetri."

Þá finnst henni að fólk sem leitar í skýlið geti fengið læknisþjónustu, og læstar hirslur fyrir eigur sínar, í stað þess að þurfa að bera aleiguna með sér alla daga.

Alma skrifaði grein um baráttu sína á vefinn Bleikt.is og stofnaði sérstaka Facebook-síðu málefnið.

„Ég hef haft áhuga á málefnum útigangsfólks allt frá því að ég var barn, ég veit ekki alveg af hverju," segir hún.

Það var síðan fyrir tveimur árum sem Alma kynntist Lofti Gunnarssyni.

„Ég kynntist Loft vini mínum, sem er reyndar látinn núna, fyrir utan vinnuna mína," segir Alma. Einhvern veginn urðum við perluvinir og vorum rosalega mikið að spjalla um hvað við gætum gert til að bæta hag útigangsmanna."

„Svo núna, á þessu ári, hnígur Loftur niður á Laugaveginum og deyr, og það er ekki vitað af hverju. Þá fannst mér ég þurfa að standa upp og berjast í hans nafni og gera það sem við ætluðum að gera saman."