Lögðu hald á amfetamín og kannabisefni

Lögreglan á Suðurnesjum fann meint amfetamín í bifreið sem stöðvuð var vegna gruns um að ökumaður æki undir áhrifum fíkniefna. Farþegi í bílnum játaði að eiga efnin, að því er fram kemur í tilkynningu frá lögreglu. Lögregla hefur á undanförnum dögum haldlagt nokkurt magn af meintu amfetamíni og kannabisefnum í umdæminu.

Þá fann lögregla kannabisefni í íbúðarhúsi, sem leitað var í að fenginni heimild, og játaði húsráðandi eign sína á efninu. Karlmaður framvísaði einnig pakkningu með hvítu dufti þegar lögregla gaf sig á tal við hann fyrir utan skemmtistað.

Annar karlmaður var svo fluttur með sjúkrabifreið á Heilbrigðisstofnun Suðurnesja eftir að hann veiktist hastarlega. Hann kvaðst hafa neytt amfetamíns. Í fórum hans fundust sprautur, nálar og meint fíkniefni.