Fullt út úr dyrum á „yndislegu“ Þorrablóti Miðflokksins

Miðflokkskarlar og -konur skemmtu sér konunglega á árlegu þorrablót flokksins sem fram fór í sal Blaðamannafélagsins við Síðumúla í gærkvöldi. Miðflokksfólk blótaði annað árið í röð en í fyrra var Fjörukráin vettvangurinn.

Fullt var út úr dyrum og komust færri að en vildu. Var biðlisti eftir sætum á blótið og setið við enda borða svo koma mætti sem flestum fyrir. Lykilmaður í flokknum lýsir samkomuninni sem yndislegri.

Veislustjóri á samkomunni var þingmaðurinn Þorsteinn Sæmundsson en fleiri tóku til máls. Þeirra á meðal formaður flokksins Sigmundur Davíð Gunnlaugsson sem mættur var ásamt eiginkonu sinni Önnu Sigurlaugu Pálsdóttur. Aðstoðarmaður Sigmundar Davíðs, Jón Pétursson, lét sig ekki vanta.

Sigmundur Davíð brá á leik í ræðu sinni á blótinu. Mætti hann með útprentuð blöð límd saman þar sem var að finna slóðir á allar fréttir sem skrifaðar hafa verið af Klaustursmálinu svonefnda. 

Þá kom hann inn á þá staðreynd að ýmsir héldu því fram að hann væri geðveikur. Svo margir að hann væri tilbúinn að leggjast inn á geðdeild Landspítalans svo framarlega sem spítalinn væri á Vífilsstöðum eða Keldnaholti.

Þannig gæti hann slegið tvær flugur í einu höggi og hugsanlegt að fólk rjúki til og byggi Landspítala á þeim stöðum - í þeim tilgangi að koma honum á geðdeild. Er óhætt að segja að gestir hafi skemmt sér yfir gríni Sigmundar sem líst ekkert á að Nýr Landspítali rísi við Hringbraut.

Þingmaðurinn Gunnar Bragi Sveinsson mætti með unnustu sína Sunnu Gunnars Marteinsdóttur upp á arminn.

Borgarfulltrúinn Vigdís Hauksdóttir lék við hvurn sinn fingur og náði þessari mynd af sér og vinkonum sínum, „skyttunum“ eins og Vigdís kemst að orði.

Er vel er að gáð má sjá skugga Davíðs Oddssonar á myndinni fyrir aftan þær.

 

Veðurfræðingurinn Sigurður Þ. Ragnarsson, oft nefndur Siggi stormur, fékk sæti á fremsta bekk. Sigurður leiddi lista flokksins í Hafnarfirði í kosningunum í fyrra og var að sjálfsögðu með Hólmfríði Þórisdóttur eiginkonu sinni.

„Yndisleg skemmtun í alla staði. Ræða formanns afar góð, veislustjóri Þorsteinn Sæmundsson stóð sig frábærlega,“ sagði Siggi stormur.

Birgir Þórarinsson þingmaður var sömuleiðis mættur eins og Jón Hjaltalín Magnússon, fyrrverandi landsliðsmaður í handbolta og formaður Handknattleikssambands Íslands. Þá var þingmaðurinn Bergþór Ólason líka á svæðinu.

Almennur þorramatur var í boði en eins og tíðkast á þorrablótum á höfuðborgarsvæðinu var einnig í boði annar hátíðarmatur, lambapottréttur með hrísgrjónum í tilfelli Miðflokksfólksins.

Snorri Þorvaldsson birti þessar fínu myndir frá samkomunni á Facebook-síðu sinni.