Enn eitt mannskæða snjóflóðið í Alpafjöllum

Einn er látinn og tveir slösuðust eftir að hafa lent í snjóflóði í suðurhluta Sviss í morgun. Þetta er það nýjasta í röð slysa í Alpafjöllum að undanförnu þar sem fólk hefur lent í snjóflóðum eftir mikla úrkomu síðustu daga og vikur.

Maðurinn sem lést var 39 ára Frakki sem var í hópi sjö franskra skíðamanna. Tveir þeirra slösuðust lítillega í flóðinu. Slysið varð í fjallinu Vanil Carré í héraðinu Chateau-d'Oex.

Hæsta viðbúnaðarstig vegna hættu á snjóflóðum ríkir nú víðs vegar í Sviss. Í síðustu viku fórust þrír í snjóflóði í Austurríki.

Yfirvöld í Frakklandi hafa sömuleiðis varað við hættu á snjóflóðum í fjöllunum nærri svissnesku landamærunum.