Fjórir metnir mjög vel hæfir í stöðu seðlabankastjóra

Hæfisnefnd hefur metið fjóra umsækjendur um starf seðlabankastjóra mjög vel hæfa. Þetta herma heimildir Kjarnans sem greinir frá málinu á vef sínum í dag.

Umsækjendurnir fjórir eru Gylfi Magn­ús­son, dós­ent við Háskóla Íslands, Ásgeir Jóns­son, for­seti hag­fræði­deildar Háskóla Íslands, Jón Dan­í­els­son, pró­fessor við LSE í London, og Arnór Sig­hvats­son, ráð­gjafi seðla­banka­stjóra og fyrr­ver­andi aðal­hag­fræð­ingur og aðstoð­ar­seðla­banka­stjóri. Þeir hafa auk þess allir doktorspróf í hagfræði.

Sextán sóttu um stöðu seðlabankastjóra en í vikunni var greint frá því að Benedikt Jóhannesson fyrrverandi fjármálaráðherra hafi dregið umsókn sína til baka. Benedikt kvaðst ósáttur við að hæfisnefndin hygðist ekki taka tillit til sameiningar Seðlabankans og Fjármálaeftirlitsins við mat sitt.

Þá herma heimildir Kjarnans að tveir aðrir umsækjendur hafi einnig dregið umsókn sína til baka en þess er ekki getið hverjir þeir eru. Sam­kvæmt heim­ildum Kjarn­ans var tólf umsækj­endum skipt niður í hæf­is­flokka; hæfa, vel hæfa, og mjög vel hæfa. Umsækj­endur hafi nú frest til þess að gera athuga­semdir við hæf­is­mat nefnd­ar­inn­ar, til 19. júní, sem hæf­is­nefndin tekur síðan til­lit til. 

Katrín Jakobsdóttir forsætisráðherra skipaði hæfisnefndina en hún mun skipa seðlabankastjóra. Nýr seðlabankastjóri tekur við af Má Guðmundssyni sem hefur gegnt stöðunni í áratug.

Hæfisnefndina skipa formaður Sigríður Benediktsdóttir, hagfræðingur við Yale-háskóla og bankaráðsmaður í Landsbankanum, Eyjólfur Guð­­munds­­son, rektor Háskól­ans á Akur­eyri og Þór­unn Guð­­munds­dótt­ir, hæsta­rétt­­ar­lög­­maður og vara­­for­­maður banka­ráðs. Þórunn kvaðst bundin þagnarskyldu og gat ekki tjáð sig um málið þegar Vísir náði tali af henni í dag.

Umsækjendur um embætti seðlabankastjóra voru eftirfarandi í upphaflegri tilkynningu frá stjórnarráðinu:

Arnór Sighvatsson, ráðgjafi seðlabankastjóra

Ásgeir Jónsson, dósent og forseti hagfræðideildar Háskóla Íslands

Ásgeir Brynjar Torfason, lektor við Háskóla Íslands

Benedikt Jóhannesson, fyrrverandi fjármála- og efnahagsráðherra

Gunnar Haraldsson, hagfræðingur

Gylfi Arnbjörnsson, hagfræðingur

Gylfi Magnússon, dósent

Hannes Jóhannsson, hagfræðingur

Jón Daníelsson, prófessor

Jón G. Jónsson, forstjóri bankasýslu ríkisins

Katrín Ólafsdóttir, lektor

Salvör Sigríður Jónsdóttir, nemi

Sigurður Hannesson, framkvæmdastjóri

Sturla Pálsson, framkvæmdastjóri markaðsviðskipta og fjárstýringar í Seðlabanka Íslands

Vilhjálmur Bjarnason, lektor

Þorsteinn Þorgeirsson, sérstakur ráðgjafi á skrifstofu seðlabankastjóra