Erlent

Konan sem fannst í sjónum í Tromsø er látin

Atli Ísleifsson skrifar
Móðirin og stúlkurnar eru allar erlendir ríkisborgarar.
Móðirin og stúlkurnar eru allar erlendir ríkisborgarar. Getty

Kona á þrítugsaldri og stúlka á grunnskólaaldri sem fundust í sjónum við Tromsø í gærkvöldi eru látnar. Tvær stúlkur sem fundust í sjónum á sama stað hafa verið fluttar á Ríkissjúkrahúsið í höfuðborginni Osló, en báðar eru þær í lífshættu.

Norskir fjölmiðlar greindu frá því í gærkvöldi að vegfarendur hafi komið að barnavagni við ströndina við Fagereng og að fótspor í snjónum hefðu leitt niður að sjó. Þar hafi stigvél fundist.

Björgunarlið fann svo fólkið í sjónum þar sem ekkert þeirra var með lífsmarki. Endurlífgun var þá reynd, en greint var frá því í gærkvöldi að ein stúlknanna hafi þá verið úrskurðuð látin. Í morgun var svo tilkynnt að móðirin hafi einnig látið lífið.

Móðirin og stúlkurnar eru allar erlendir ríkisborgarar að því er fram kemur í frétt NRK.

Tromsø í Norður-Noregi. Getty

Lögregla hefur greint frá því að hún verið í samskiptum við föður stúlknanna og hefur hann stöðu vitnis í málinu. Lögregla heldur annan blaðamannafund vegna málsins klukkan níu að íslenskum tíma.

Umfangsmikil björgunaraðgerð fór fram eftir að fólkið fannst þar sem notast var við kafara og þyrlur til að leita af sér grun um hvort að fleira fólk væri í sjónum.

Lögreglustjórinn í Tromsø, Anita Hermandsen, segir of snemmt að segja til um hvort að um slys hafi verið að ræða eða hvort að eitthvað saknæmt hafi átt sér stað.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.