Sportpakkinn: „Katla gerði bara það sem ég átti ekki von á“

Arnar Björnsson fór yfir níundu umferð Domino´s deildar kvenna sem fór fram í gærkvöldi en þar héldu topplið Vals og lið Keflavíkur áfram sigurgöngu sinni og KR og Skallagrímur unnu einnig sína leiki.

Valur flýgur áfram í átt að deildarbikartitlinum í eftir ellefta sigurinn í röð. Í gærkvöldi átti Valur ekki í vandræðum með Snæfell. Valsliðið hafði forystu allan tímann og mestur varð munurinn 28 stig.  

KR tapaði fyrir Keflavík í síðustu umferð en í gærkvöldi var vesturbæjarliðið miklu kraftmeira gegn Breiðabliki. Það var aðeins í byrjun að Blikar héldu í við KR-liðið en þegar fyrsta leikhluta lauk var munurinn þrettán stig, 28-15. KR vann að lokum 30 stiga sigur, 90-60.

Mesta spennan í gærkvöldi var í Keflavík þegar Haukar komu í heimsókn. Keflavík komst í 7-1 en Haukar svöruðu með 10 stigum í röð og náðu mest 14 stiga forystu, 25-11. Haukar voru með undirtökin lengst af í fyrri hálfleik en þegar skammt var til leikhlés kom Irena Sól Jónsdóttir Keflavík yfir, 48-46 og Keflavík var tveimur stigum yfir í hálfleik. Haukar byrjuðu lokafjórðunginn vel og náðu fjögurra stiga forystu. Randi Keonsha Brown var stigahæst Haukakvenna, skoraði 26 stig, Þóra Kristín Jónsdóttir skoraði 11 og Sigrún Björg Ólafsdóttir tók 14 fráköst. Lokakaflinn var æsispennandi, níu sinnum skiptust liðin á um að hafa forystu.

Bríet Lilja Sigurðardóttir skoraði úr öðru vítaskoti sínu og Haukar náðu þriggja stiga forystu, seinna skotið klikkaði og besti maður vallarins, Katla Rún Garðarsdóttir jafnaði metin úr þriggja stiga skoti þegar skammt var eftir. Katla Rún kláraði leikinn fyrir Keflavík, hún hitti úr 6 af 7 þriggja stiga skotum sínum. Líkt og í sigri Keflavíkur á KR um helgina var Keflavíkurliðið öflugt í lokin og vann 78-70. Katla Rún skoraði 22 stig og þjálfarinn var ánægður með hennar leik eins og sjá má í viðtalinu við hann eftir leikinn.

Hér fyrir neðan fer Arnar Björnsson yfir leiki gærkvöldsins í kvennakörfunni.