KR ekki í vandræðum í Stykkishólmi

KR lenti í engum vandræðum með Snæfell í 6. umferð Dominos-deildar kvenna er liðin mættust í Stykkishólmi í kvöld. Lokatölur 81-57.

Það var ágætis kraftur í KR í fyrri hálfleik en þær leiddu í hálfleik, 42-30. Þær unnu svo þriðja leikhlutann með sjö stigum og lentu aldrei í vandræðum með heimastúlkur.

Sanja Orazovic skoraði 24 stig og tók átta fráköst. Danielle Victoria Rodriguez bætti við fimmtán stigum, tók fimm fráköst og gaf sex stoðsendingar.

Gunnhildur Gunnarsdóttir var stigahæst í liði heimastúlkna. Hún skoraði sextán stig og tók tólf fráköst. Emese Vida kom næst með fjórtán stig og sautján fráköst.

KR er með jafnmörg stig og Valur á toppi deildarinnar en Valur spilar gegn Haukum annað kvöld. Snæfell er með fjögur stig í 6. sætinu.