Innlent

Deilt um dag­bókar­færslur lög­reglu í stóra am­feta­mín­málinu

Sunna Kristín Hilmarsdóttir skrifar
Einn hinna ákærðu mætir hér í dómsal við þingfestingu málsins fyrr í mánuðinum. Þeir þrír sem ákærðir eru fyrir amfetamínframleiðslu í Borgarfirði hafa setið í gæsluvarðhaldi síðan málið kom upp í júní.
Einn hinna ákærðu mætir hér í dómsal við þingfestingu málsins fyrr í mánuðinum. Þeir þrír sem ákærðir eru fyrir amfetamínframleiðslu í Borgarfirði hafa setið í gæsluvarðhaldi síðan málið kom upp í júní. vísir/vilhelm

Verjendur og saksóknari í umfangsmiklu fíkniefnamáli þar sem þrír menn eru ákærðir fyrir framleiðslu á rúmum átta kílóum af amfetamíni í sumarbústað í Borgarfirði tókust á um það fyrir dómi í dag hvort ákæruvaldinu beri að leggja fram dagbókarfærslur lögreglu í málinu.

Verjendur þremenninganna kröfðust þess að færslurnar verði lagðar fram en sækjandi hafnaði kröfunni á þeim grundvelli að um vinnuskjal lögreglu væri að ræða en ekki sönnunargögn í málinu.

Áður en fjallað var sérstaklega um kröfur verjendanna við fyrirtöku málsins í dag kallaði dómari eftir afstöðu fjögurra ákærðu í málinu, þeirra á meðal afstöðu þeirra Einars Jökuls Einarssonar og Alvars Óskarssonar, sem hlutu þunga dóma í Pólstjörnumálinu svokallaða fyrir áratug.

Sakborningar huldu andlit sín við þingfestingu þegar þau komu í dómsal og gerðu það einnig í dag. vísir/vilhelm

Játuðu kannabisframleiðslu í útihúsi við sveitabæ

Eru þeir Einar og Alvar ákærðir ásamt Margeiri Pétri Einarssyni fyrir framleiðslu á amfetamíninu auk þess sem þeir sæta ákæru í þeim þætti málsins sem snýr að kannabisframleiðslu í útihúsi við sveitabæ í nágrenni Hellu.

Tóku þeir Einar og Alvar ekki afstöðu til sakarefnisins þar sem enn væri verið að leggja fram gögn í málinu og þeir ættu eftir að sjá þessi gögn og taka afstöðu til þeirra.

Þá vísaði Stefán Karl Kristjánsson, verjandi Alvars, einnig í það er rannsókn lögreglu á meintu peningaþvætti í tengslum við fíknefnaframleiðsluna. Er þeirri rannsókn ólokið og neituðu þeir Alvar og Einar að taka afstöðu til ákærunnar við þingfestingu vegna þess.

Margeir hafði við þingfestingu játað sök í þeim þætti sem snýr að kannabisframleiðslunni fyrir utan það sem sneri að rúmlega 800 grömmum af maríjúana. Hann neitar hins vegar sök varðandi amfetamínframleiðsluna.

Þrjú til viðbótar voru ákærð fyrir kannabisframleiðsluna í útihúsunum við sveitabæinn á Suðurlandi. Þau hafa játað sök og þá upplýstist við fyrirtökuna í dag að 800 grömmin af maríjúana sem enginn kannaðist við þegar málið var þingfest voru í eigu eins þeirra þriggja sem hafa játað.

Var þeirra mál klofið frá þeim hluta ákærunnar er varðar amfetamínframleiðsluna og var það flutt sem játningarmál eftir að fjallað hafði verið um kröfu verjenda um gagnaframlagningu. Fór saksóknari fram á tólf mánaða fangelsi yfir fólkinu.

Einn sakborninga með klút, sólgleraugu og hettu við þingfestingu í héraðsdómi. vísir/vilhelm

Ekki hægt að velja eftir hentisemi hvenær eigi að leggja fram dagbókarfærslur og hvenær ekki

Stefán Karl krafðist þess að embætti héraðssaksóknara, sem sækir málið, verði gert að afhenda öll gögn málsins, þar með talið dagbókarfærslur lögreglu, afrit af hlerunum og hlustunum sem og öll önnur gögn sem kunna að hafa orðið til við rannsókn á málinu.

Sagði Stefán Karl ákæruvaldið ekki geta valið það að leggja fram dagbókarfærslur eftir því hvenær það hentaði og hvenær ekki. Tók hann sem dæmi aðalmeðferð í máli héraðssaksóknara gegn Árna Gils Hjaltasyni sem nú er rekið í annað sinn fyrir Héraðsdómi Reykjavíkur.

Þar höfðu tiltekin gögn verið lögð fram fyrst þegar málið var tekið fyrir hjá héraðsdómi en nú þegar það vantaði upp á sönnunarfærsluna væri brugðið á það ráð að leggja fram dagbókarfærslur lögreglu.

Stefán Karl sagði að ákæruvaldið gæti ekki valið það svona eftir hentisemi hvenær leggja ætti fram dagbókarfærslur og hvenær ekki.

Þá krafðist hann þess einnig að héraðssaksóknari hlutist til um að taka til afgreiðslu þann þátt málsins sem snýr að meintu peningaþvætti og eftir atvikum gefa út ákæru eða fella málið niður. Tóku verjendur Einars og Margeirs undir kröfur Stefáns Karls.

Sumarbústaðurinn í Heyholtslandi í Borgarfirði þar sem amfetamínsframleiðslan fór fram.

Úrskurðar að vænta eftir helgi

Dagmar Ösp Vésteinsdóttir, saksóknari, hafnaði kröfum verjendanna með öllu. Sagði hún dagbókarfærslur lögreglu vinnuskjal og ekki sönnunargögn. Það sama ætti við um afrit af öllum hlustunum.

Þá sagði hún að henni væri ekki kunnugt um önnur nein önnur gögn í málinu en þau sem lögð höfðu verið fram. Öll þau gögn sem málið væri byggt á hefðu verið lögð fram og kvaðst Dagmar ekki átta sig á því hvað verjandi væri að fara með því að ýja að öðru.

Að lokum sagði hún að gögn í peningaþvættismálinu væru ekki á forræði sækjanda heldur væri það lögreglan á höfuðborgarsvæðinu sem færi með rannsókn þess máls. Því gæti sækjandi ekki afhent gögn úr því máli.

Dómari tók sér frest fram yfir helgi til að úrskurða um kröfu verjenda um gögnin. Þá var ákveðið að aðalmeðferð málsins fari fram 22. og 23. október næstkomandi.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.