Mike Pence lentur

Mike Pence, varaforseti Bandaríkjanna, er kominn til Íslands ásamt eiginkonu sinni Karen Pence. Komu þau til landsins með flugvélinni Air Force Two sem lenti á Keflavíkurflugvelli un klukkan eitt í dag.

Hjónanna bíður mikil dagskrá í dag en þau byrja á að drekka kaffi með Guðna Th. Jóhannessyni, forseta Íslands, og Elizu Reid forsetafrú klukkan 14.

Talið er að það kaffiboð muni fara fram í Höfða.

Að kaffidrykkju lokinni með forsetahjónunum tekur Mike Pence þátt í viðskiptaþingi í Höfða sem hefst klukkan 14:30.

Rúmum klukkutíma síðar mun varaforsetinn fara í skoðunarferð um Höfða en þaðan heldur hann út á varnarsvæðið í Keflavík þar sem hann kynnir sér öryggismál við Norður-Atlantshaf.

Klukkan 18:45 á hann síðan tvíhliða fund með Katrínu Jakobsdóttur, forsætisráðherra, á Keflavíkurflugvelli áður en hann og Karen, kona hans, halda af landi brott tæpum klukkutíma síðar.

Fylgjast má með beinni útsendingu frá heimsókn varaforseta Bandaríkjanna til Íslands hér.