Erlent

Hrottafengin líkamsárás á Andy Dick náðist á öryggismyndavél

Tryggvi Páll Tryggvason skrifar
Margir kannast við grínistann Andy Dick.
Margir kannast við grínistann Andy Dick. Vísir/Getty

Lögreglan í New Orleans í Bandaríkjunum rannsakar nú hrottafengna líkamsárás sem grínistinn Andy Dick varð fyrir utan skemmtistað í Franska hverfinu í borginni um helgina. Árásin náðist á öryggismyndavél.

Á myndbandinu má sjá karlmann í dökkum fatnaði snúa sér skyndilega að Dick, sem hafði verið að skemmta í bænum síðastliðið föstudagskvöld. Sjá má hvernig árásarmaðurinn lætur eitt högg dynja á Dick af fullum þunga, með þeim afleiðingum að Dick kastaðist í nærliggjandi byggingu áður en hann féll til jarðar.

Sjálfur segir Dick að hann hafi verið meðvitundarlaus í um fimmtán mínútur eftir höggið. Var hann fluttur með skyndi á gjörgæslu þar sem hann undirgekkst rannsóknir vegna ótta um heilablæðingu.

Lögreglan í New Orleans hefur þegar handtekið manninn sem grunaður er um árásina en ekki liggur fyrir hvað árásarmanninum gekk til.

Dick er þekktur grínisti í Bandaríkjunum og hefur leikið í fjölda grínþátta og kvikmynda, ber þar helst að nefna The Ben Stiller Show og kvikmyndina Reality Bites.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.