Ríkissjóður fær tíu milljarða við sölu Arion banka
Kaupskil, félag í eigu Kaupþings, hefur lokið sölu á öllu hlutafé sínu í Arion banka, eða 20 prósent eignarhlut í bankanum. Söluverð var 27,4 milljarðar króna, eða 75 og hálf króna á hlut, að því er segir í tilkynningu frá Kaupþingi, og voru kaupendur innlendir og erlendir fjárfestar.
Heimildir Fréttablaðsins herma að vogunarsjóðurinn Taconic Capital kaupi rúmlega helminginn af bréfunum en fyrir átti sjóðurinn 16 prósent hlut í bankanum.
Rétt tæplega tíu milljarðar króna af andvirði sölunnar renna til ríkissjóðs. Komist var að bindandi samkomulagi um kaupin þann 1. júlí síðastliðinn en haft er eftir Paul Copley forstjóra Kaupþings í tilkynningu að kaupin séu mikilvægt skref í átt að endanlegum slitum félagsins.
Tengdar fréttir
Ásgeir Helgi Reykfjörð aðstoðarbankastjóri Arion banka
Ásgeir Helgi Reykfjörð Gylfason hefur verið ráðinn aðstoðarforstjóri Arion banka.
Taconic að auka hlut sinn í Arion um helming
Bandaríski vogunarsjóðurinn Taconic Capital, sem fer núna með sextán prósenta hlut í Arion banka, mun kaupa tæplega helminginn af tuttugu prósenta hlut Kaupþings í bankanum en eignarhaldsfélagið er nú að ganga frá sölu á öllum bréfum sínum í Arion banka, líklega strax í þessari viku.
Kaupþing selur allan hlut sinn í Arion banka
Kaupþing hefur lengst af átt stóran meirihluta í Arion banka frá endurreisn bankans, en nú stendur til að selja þau 20% sem eftir eru af hlut félagsins.
