Sumarspá Siggu Kling – Fiskarnir: Slepptu því núna alveg að plana

Elsku Fiskurinn minn, þetta er fjölbreyttur og að mörgu leyti afslappandi tími sem er að sigla til þín, þú finnur að hjarta þitt er að slá í takt við tilveruna og þú verður einhvernveginn miklu rólegri yfir aðstæðum en þú hefur áður verið. Þér mun svo sannarlega ekki leiðast í sumar, þú finnur leið til að efla þitt innra sjálf og vera svo stoltur af litlu hlutunum og lífinu.

Þú þarft ekki að hafa áhyggjur af neinu, því þín ótrúlega færni til að aðlagast aðstæðum mun svo sannarlega koma sér vel í sumar. Við sem búum hér á landi reynum svo oft að elta sólina, en í þínu tilfelli mun sólin fylgja þér og fá þig til að upplifa lífið á annan máta.

Slepptu því núna alveg að plana of mikið og segðu ekki já við því sem þig langar ekki að gera, þá raðast allt fullkomlega upp. Undir yfirborði þínu lúrir viðkvæm sál sem gerir þig að svo eftirsóknarverðum vin og líka eftirsóknarverðann í ástinni, ef þú ert ekki nú þegar búinn að finna ástina þá opnaðu aðeins betur augun og þá sérðu hún er að veifa þér.

Mikil rómantík dvelur í þessu sólarsumri og persónur sem hafa heillað þig áður fyrr skjóta upp kollinum þegar síst varir og þetta segir þér að enginn gleymir þér, fólk leitar til þín aftur og aftur því þú ert svo sterk minning.

Það býr svo mikið sveitabarn í þér og þessvegna er svo mikilvægt fyrir þig að vera umkringdur dýrum, það er eins og þú skiljir þau oft betur en mannfólkið. Það segir þér líka að þú ert svo óendanlega tengdur við hið andlega, móður Jörð, Alheiminn og allt saman því það er alltaf verið að senda þér skilaboð, svo ræktaðu þessa andlegu þætti þína þá stoppar þig fátt.

Ég vil ráðleggja þér að hætta að vera alltaf í símanum, sérstaklega núna í sumar, gefðu honum bara frí ef þú getur því hann truflar orkuna þína og þína andlegu hæfileika.

Kossar og knús, Sigga Kling.

Fiskar 19. febrúar - 20. mars

Höddi Magg, fjölmiðlamaður, 19. febrúar 

Baltasar Kormákur, leikstjóri, 27. febrúar 

Albert Einstein, vísindamaður, 14. mars 

Sigmundur Davíð Gunnlaugsson, 12. mars 

Ólafur Darri Ólafsson, leikari, 13. mars 

Vigdís Hauksdóttir, stjórnmálamaður, 20. mars 

Ilmur Kristjánsdóttir leikkona, 19. mars 

Páll Óskar poppstjarna, 16. mars 

Elín Metta Jensen, fótboltakona, 1. mars 

Rihanna, tónlistarkona, 20. febrúar 

Liz Taylor, leikkona, 27. febrúar