Innlent

Engin 20 stig í kortunum

Stefán Ó. Jónsson skrifar
Það gæti rofað til á höfuðborgarsvæðinu í dag, en engu að síður má búast við rigningu með köflum.
Það gæti rofað til á höfuðborgarsvæðinu í dag, en engu að síður má búast við rigningu með köflum. vísir/vilhelm

Hlýindin sem heilsuðu upp á landsmenn í síðustu viku munu ekki láta sjá sig næstu daga að sögn Veðurstofunnar. „Það er skemmst frá því að segja að í vikunni sem nú er að hefjast en engin von um að 20 stig mælist á landinu,“ segir veðurfræðingur sem boðar umskipti á hitastiginu, sérstaklega um landið norðaustanvert sem verður kaldasti landshlutinn þessa vikuna. Þar fór hitinn einmitt í 20 gráður þegar best lét í síðustu viku.

Búast má við því að norðaustanáttin komi svöl af hafi og að rigningarsuddi kunni að fylgja með. Það rofi þó sums staðar til á Vesturlandi að deginum, en líkur á skúrum síðdegis. Hiti frá 4 stigum á norðausturhorninu, upp í 13 stig á Vesturlandi.

„Þegar norðaustanátt hefur verið nefnd í spánni eru eflaust margir íbúar sunnan heiða sem vonast eftir sólskini. Lægðardrag er hins vegar viðloðandi suðurhluta landsins og útlit fyrir að það verði meira og minna skýjað um allt land bæði í dag og á morgun og einhver væta í flestum landshlutum. Hitinn verður frá 4-5 stigum á norðausturhorninu, upp í 13-14 stig á Vesturlandi, en þar er helst von að örlítil göt myndist í skýjahlemminn sem liggur yfir landinu,“ segir veðurfræðingur.

Veðurhorfur á landinu næstu daga

Á þriðjudag:
Norðaustan og austan 3-10 m/s og dálítil rigning eða súld. Skýjað með köflum á Vesturlandi og stöku skúrir síðdegis. Hiti frá 5 stigum með norðausturströndinni upp í 14 stig á Vesturlandi.

Á miðvikudag og fimmtudag:
Norðaustlæg eða breytileg átt 3-8. Skýjað á landinu og sums staðar svolítil væta. Hiti 5 til 12 stig, hlýjast á Suðvesturlandi.

Á föstudag:
Hæg vestlæg eða breytileg átt. Skýjað að mestu og skúrir á víð og dreif, einkum síðdegis. Hiti breytist lítið.

Á laugardag og sunnudag:
Norðaustan 5-13 m/s. Víða dálítil rigning, jafnvel slydda í innsveitum norðan- og austanlands. Úrkomulítið á Vesturlandi. Hiti frá 2 stigum í innsveitum fyrir norðan, upp í 10 stig á Vesturlandi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.