Innlent

Á fimmta hundrað verkefna bíða fimm þingfundardaga

Sveinn Arnarsson skrifar
Guðlaugur Þór Þórðarson mælti fyrir frumvarpi um svonefndan þriðja orkupakka 8. apríl.
Guðlaugur Þór Þórðarson mælti fyrir frumvarpi um svonefndan þriðja orkupakka 8. apríl. Fréttablaðið/Sigtryggur

Alþingi Þingmenn Miðflokksins hafa upp á síðkastið farið mikinn í umræðum um þriðja orkupakkann. Við það hafa störf þingsins riðlast og margt bíður umfjöllunar. Næsta vika mun skera úr um hvort skera þurfi á hnútinn og stöðva umræður um orkupakkann.

Alls bíður 71 lagafrumvarp nú fyrstu umræðu í þinginu og tíu önnur bíða annarrar umræðu. Á sama tíma eru heil 105 lagafrumvörp í meðförum þingnefnda. Því er í mörg horn að líta hjá þingmönnum næstu tvær vikurnar en samkvæmt áætlun á þingstörfum að ljúka þann 5. júní næstkomandi.

Aðeins fimm þingfundardagar eru eftir samkvæmt áætlun. Auk lagafrumvarpa eru 113 þingsályktunartillögur sem bíða afgreiðslu þingsins. Ráðherrar eiga einnig eftir að svara heilum 142 fyrirspurnum þingmanna.

Þótt erfitt sé að spá fyrir um slíkt er líklegt að starfsáætlun þingsins muni fara úr skorðum að einhverju leyti á næstu dögum. 

Steingrímur J. Sigfússon, forseti Alþingis.

Forseti þings, Steingrímur J. Sigfússon, segir það ráðast í næstu viku hvernig málum verði háttað en þegar líði á fari menn að spila af fingrum fram.

Í umræðum í gær var varpað fram þeirri hugmynd hvort virkja ætti 71. grein þingskaparlaga. Þá getur forseti þings skorið á hnútinn og stöðvað umræður eða stytt þær. Einnig geta níu þingmenn krafist þess að greidd séu atkvæði um það umræðulaust hvort umræðu skuli lokið.

Þingforseti er ekki á þeim buxunum að nýta ákvæðið nú. „Það hefur ekki komið til tals og menn verða að fara varlega í þeim efnum,“ segir Steingrímur. „Nú skulum við sjá til hvernig framvindan verður. Fram undan eru þingnefndardagar svo það er ekki tímabært að velta því fyrir sér á þessum tímapunkti.“

Ólafur Ísleifsson, þingmaður Miðflokksins, segir orkupakkamálið þurfa mun meiri yfirferð. „Málið þarfnast mun meiri skoðunar. Við í þingflokki Miðflokksins teljum marga fleti á málinu ekki hafa verið rædda nægjanlega mikið. Við teljum að aukin umræða um málið muni fjölga andstæðingum málsins,“ segir Ólafur. Hann telur ekki um málþóf að ræða af hendi Miðflokksmanna. „Við auðvitað myndum fagna því ef þetta frumvarp yrði lagt til hliðar og skoðað mun betur en nú er gert. Það er mjög mikilvægt að okkar mati.“

Bryndís Haraldsdóttir, þingmaður Sjálfstæðisflokks, minnti í ræðu sinni um fundarstjórn forseta á að níu þingmenn gætu kallað til atkvæðagreiðslu um hvort umræðum skyldi hætt og sagði þingið hertekið af þingmönnum Miðflokks. Hún segist hins vegar ekki vera að safna liði. „Nei, ég er nú ekki að safna liði en það þarf að skoða hvernig þingið hefst í næstu viku. Mörg mál munu bíða okkar þingmanna eftir þingnefndardaga á fimmtudag og föstudag og því mikilvægt að taktur komist á þingstörf á nýjan leik.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.