Firmino verður með í úrslitaleiknum

Roberto Firmino verður með Liverpool í úrslitaleik Meistaradeildar Evrópu á laugardaginn. Rauði herinn mætir þá Tottenham á Wanda Metropolatino, heimavelli Atlético Madrid.

Firmino hefur misst af síðustu fjórum leikjum Liverpool vegna meiðsla í nára. Hann hefur hins vegar æft með Liverpool að undanförnu og er búinn að ná sér.

„Bobby æfði með okkur í síðustu viku og verður með á æfingu á morgun. Hann lítur vel út og tekur örugglega þátt í úrslitaleiknum,“ sagði Jürgen Klopp, knattspyrnustjóri Liverpool.

Naby Keïta verður hins vegar fjarri góðu gamni í úrslitaleiknum vegna meiðsla.

Keïta meiddist í fyrri leiknum gegn Barcelona í undanúrslitum Meistaradeildarinnar og hefur ekkert spilað síðan þá.