Magic sagður hafa verið með ógnandi tilburði við starfsfólk Lakers

Það gengur ekkert innan vallar hjá NBA-liðinu LA Lakers og staðan utan vallar virðist vera litlu betri.

Magic Johnson hætti mjög óvænt sem forseti Lakers á dögunum án þess að láta nokkurn mann vita. Hann sagði síðar að hann hefði verið stunginn í bakið af framkvæmdastjóra félagsins, Rob Pelinka, og hafði engan áhuga á að starfa áfram í slíku umhverfi.

Nú virðist vera að koma í ljós að Magic sjálfur hafi nú ekki verið barnanna bestur sjálfur í framkomu. Þó nokkrir starfsmenn hafa nefnilega stigið fram og sakað Magic um hrokafulla framkomu.

Starfsfólkið segir að Magic hafi svarað öllum fyrirspurnum í hótandi tón. Hann hafi verið með ógnandi tilburði í garð starfsfólksins og jafnvel lagt það í einelti.

Það virðist því allt vera í toppstandi hjá félaginu á öllum vígstöðvum.