Körfubolti

Gjörbreyttur leikmaður eftir fæðingu sonarins

Óskar Ófeigur Jónsson skrifar
Fred VanVleet.
Fred VanVleet. Getty/Gregory Shamus

Frammistaða Fred VanVleet í úrslitum Austurdeildarinnar átti mikinn þátt í því að Toronto Raptors er komið í lokaúrslit NBA-deildarinnar í fyrsta sinn.

Það vissu kannski ekki allir hver þessi 25 ára bakvörður væri fyrir þessa úrslitakeppni enda er hann einn af nokkrum góðum liðsmönnum í liði Toronto Raptors.

Frammistaða hans í síðustu þremur leikjum Toronto Raptors hefur hins vegar ýtt honum upp á stjörnuvagninn.

Fred VanVleet virðist hreinlega vera gjörbreyttur leikmaður eftir fæðingu sonarins. Fred Jr. fæddist 20. maí síðastliðinn og síðan hefur pabbinn verið á miklu flugi.



Eftir að Fred yngri kom í heiminn hefur Fred VanVleet farið úr því að skora 4 stig í leik og hitta úr 20 prósent þriggja stiga skota sinna í það að skora 16,0 stig í leik og hitta úr 82 prósent þriggja stiga skota sinna.

Fred VanVleet skoraði 14 þrista úr aðeins 17 tilraunum í þessum þremur síðustu leikjum og hefur með því hjálpað til að opna völlinn fyrir Kawhi Leonard.

Fred VanVleet lék í fjögur ár með Wichita State í háskólaboltanum en var ekki valinn í nýliðavalinu 2016.
Hann fékk að taka þátt í sumardeildinni með Toronto Raptors og vann sér sæti í liðinu.

Þetta er hans þriðja tímabil með Raptors og hann hefur hækkað tölfræði sína á hverju ári. Í vetur var hann með 11,0 stig og 4,8 stoðsendingar að meðaltali í deildinni.

Fyrsti leikur Toronto Raptors og Golden State Warriors í úrslitaeinvíginu fer fram á heimavelli Toronto Raptors aðra nótt.

NBA


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.