Féll á lygaprófi í þættinum sem tekinn var af dagskrá

Breskir þingmenn hafa skorað á ITV-sjónvarpsstöðina þar í landi að hætta alfarið við frekari framleiðslu á The Jeremy Kyle Show eftir að karlmaður sem átti að koma fram í þættinum lést stuttu eftir að þátturinn sem hann var gestur í var tekinn upp.

Fjölmiðlar í Bretlandi greina frá því í dag að maðurinn hafi fallið á lygaprófi í þættinum sem hann samþykkti að gangast undir til þess að sannfæra unnustu sína um að hann hefði ekki haldið fram hjá henni. Batt hún enda á sambandið í kjölfarið.

Maðurinn lést um viku eftir að þátturinn sem hann átti að koma fram í var tekinn upp. Verið er að rannsaka með hvaða hætti andlát hans bar að. ITV hefur tekið þáttinn af dagskrá á meðan málið er til rannsóknar.

Þá hefur eldri þáttum og efni úr þáttunum sem nálgast mátti á vef ITV verið eytt út, en þátturinn var eitt vinsælasta sjónvarpsefni sjónvarpstöðvarinnar.

Þingmenn í Bretlandi hafa hvatt forsvarsmenn ITV til þess að hætta alfarið við þáttinn. Þar á meðal er Charles Walker, þingmaður Íhaldsflokksins og varaformaður nefndar breska þingsins um sjálfsvíg og forvarnir gegn þeim.

„The Jeremy Kyle Show er búinn að vera, það er langt síðan hann var búinn að vera. Nú er sérstök vika ætluð vitundarvakningu um geðheilsu og það besta sem ITV gæti gert væri að hætta við þáttinn,“ sagði Walker.

Sagði Walker að þátturinn væri byggður á því að níðast á minnimáttar og að dagskrárgerð þáttarins væri ekki í samræmi við ábyrgð og skyldur ábyrgrar sjónvarpsstöðvar. Undir orð Walkers tóku fjölmargir þingmenn.

Í þáttunum tekur stjórnandinn, Jeremy Kyle, á móti gestum sem yfirleitt eiga í einhvers konar deilum sín á milli. Á vefsíðu þáttarins er auglýst eftir þátttakendum sem vilji ræða ýmis konar vandamál á borð við forræðisdeilur, sambandsslit og fíknisjúkdóma svo dæmi séu tekin.

Þátturinn snýst svo um það að Kyle reynir að miðla málum en oftar en ekki sýður upp úr á milli þátttakenda. ITV segir að framleiðsla þáttarins verði tekin til rannsóknar eftir dauðsfall mannsins og að í bili verði ekki fleiri þættir sýndir, né framleiddir.