Viðskipti innlent

Ritstjóri DV segir upp

Kolbeinn Tumi Daðason skrifar
Kristjón Kormákur Guðjónsson.
Kristjón Kormákur Guðjónsson. Aðsend
Kristjón Kormákur Guðjónsson hefur sagt upp störfum sem aðalritstjóra DV. Þetta staðfestir Kristjón í samtali við Vísi. Hann segir erfitt að kveðja góða vini á fréttastofunni en tími hafi verið kominn á nýja áskorun. Kristjón gengur til liðs við Hringbraut.

„Það var í rauninni bara kominn tími til að gera eitthvað annað. Þetta er erfitt starf sem er unnið allan sólarhringinn,“ segir Kristjón sem hefur gegnt stöðu aðalritstjóra í rúmt ár. Hann gekk til liðs við Pressuna árið 2012 þegar Björn Ingi Hrafnsson réð þar ríkjum. Pressan tók svo yfir DV sem er nú í eigu Frjálsrar fjölmiðlunar, sem Sigurður G. Guðjónsson lögmaður er í forsvari fyrir. Karl Garðarsson gegnir stöðu framkvæmdastjóra.

Kristjón er ekki meðvitaður um frekari breytingar hjá DV þessa dagana. Það hafi þó verið blóðtaka þegar tveimur blaðamönnum var sagt upp í byrjun febrúar auk eins sem hætti. Allir þrír tilheyrðu fréttateyminu. Verið sé þó að ganga frá ráðningu á tveimur blaðamönnum að sögn Kristjóns.

Hann er spenntur fyrir nýjum tímum hjá sjónvarpsstöðinni Hringbraut en hlutverk Kristjóns verður að blása lífi í vef miðilsins. Rífa hann upp eins og Kristjón kemst að orði og tengja saman sjónvarpshlutann og vefhlutann.

„Þar er fullt af tækifærum,“ segir Kristjón sem hlakkar mjög til samstarfsins við Sigmund Erni Rúnarsson sjónvarpsstjóra. Hann mætir til vinnu á Hringbraut á morgun.


Tengdar fréttir

Ókeypis sálfræðitímar hjá ömmu

Tæpt ár er liðið síðan Jóhanna Kristjónsdóttir lést eftir baráttu við krabbamein. Í hálfa öld bjó hún í græna húsinu við Drafnarstíg sem verður áfram ættaróðal þar sem Máni Hrafnsson hefur keypt húsið.

Ég hætti að vera góður

Kristjón Kormákur Guðjónsson var fimm ára gamall þegar hann fann fyrst til hræðslu og bjargarleysis vegna heimilisofbeldis. Hann var um ellefu ára gamall þegar sjúkrabíll sótti móður hans á heimili þeirra blóðuga eftir árás fóstra hans. Samt höfðu þau það stundum svo gott. Svo gerði hann uppreisn. Hætti að vera góður. Sextán ára gamall flutti hann að heiman og sautján ára var hann kominn á götuna.






Fleiri fréttir

Sjá meira


×