SGS ákveður að halda áfram kjaraviðræðum þó staðan sé viðkvæm

Samninganefnd Starfsgreinasambands Íslands hefur samþykkt að halda áfram viðræðum við Samtök atvinnulífsins um nýjan kjarasamning en viðræðum verður haldið áfram eftir helgi.

Þetta kemur fram í tilkynningu frá Starfsgreinasambandinu.

Undanfarnar vikur hefur verið fundað nánast daglega auk þess sem vinna starfshópa um einstök málefni hefur verið í fullum gangi.

Í tilkynningunni kemur fram að viðræðurnar hafi gengið „þokkalega“ en þó tekið fram að staðan sé viðkvæm og margt enn óleyst.

„Þolinmæði Starfsgreinasambandsins í þessum kjaraviðræðum er ekki endalaus og það er ljóst að næsta vika getur ráðið úrslitum upp á framhaldið.“