Keflavík burstaði KR │Stjarnan upp að hlið Snæfells

Keflavík tók stórt skref í átt að að deildarmeistaratitlinum í Domino's deild kvenna með stórsigri á KR suður með sjó í kvöld. Stjarnan heldur sér enn í baráttunni um sæti í úrslitakeppninni.

KR og Keflavík voru jöfn að stigum á toppi Domino's deildarinnar fyrir leikinn og því um risaslag í toppbaráttunni að ræða. Keflvíkingar fóru hins vegar með þrjátíu og tveggja stiga sigur.

KR tók áhlaup undir lok fyrsta leikhluta sem skilaði þeim 14-17 forystu og var annar leikhlauti mjög jafn. Í hálfleik munaði einsu stigi á liðunum, staðan 38-37 fyrir Keflavík.

Þriðji leikhluti var hins vegar hrikalegur hjá KR. Liðið skoraði bara tíu stig. Leikhlutinn byrjaði á 14-2 kafla Keflavíkur. Perla Jóhannsdóttir skoraði fyrir KR þegar rúmar fjórar mínútur voru eftir af leikhlutanum og staðan 55-46 en þá var stigaskorun lokið hjá gestunum fyrir utan eitt vítaskot alveg í lok leikhlutans.

Fyrir síðasta leikhlutann var staðan 65-47 og úrslitin svo gott sem ráðin. Fjórði leikhluti var ekki mikið skárri hjá KR, lokastaðan 91-59.

Brittanny Dinkins skoraði 34 stig fyrir Keflavík og tók 18 fráköst. Birna Valgerður Benónýsdóttir var næst stigahæst með 19 stig. Hjá KR var Orla O'Reilly stigahæst með 25 stig.

Stjarnan heldur ennþá voninni á lofti um að komast í úrslitakeppnina. Garðbæingar unnu þægilegan 79-56 sigur á Breiðabliki á heimavelli þar sem þær leiddu allan tímann.

Stjarnan er nú jöfn Snæfelli að stigum í fjórða sætinu, bæði lið með 24 stig, en Snæfell á leik til góða gegn Val á sunnudag.

Haukar sóttu 72-59 sigur í Borgarnes þar sem liðið mætti Skallagrími. Skallagrímur byrjaði leikinn hrikalega og skoruðu heimakonur aðeins fjögur stig í fyrsta leikhlutanum. Staðan í hálfleik var 23-31 fyrir Hauka.

Bæði lið eru búin að missa af lestinni í baráttunni um úrslitakeppnina en eru örugg frá falli.