Segir ómögulegt að elska konur yfir fimmtugu

Franski rithöfundurinn og þáttastjórnandinn Yann Moix hefur valdið usla í heimalandi sínu eftir að hann sagðist eiga ómögulegt að elska konur sem væru fimmtugar eða eldri, þrátt fyrir að hann sjálfur sé fimmtugur. Í nýlegu viðtali sagði hann að konur á sama aldri og hann væru of gamlar. Hann sagði þó koma til greina að elska fimmtuga konu þegar hann sjálfur væri orðinn eldri.

„Ég er meira fyrir líkama yngri kvenna, svo einfalt er það,“ sagði Moix. „Líkami 25 ára konu er makalaus. Líkami fimmtugrar konu er alls ekkert merkilegur.“

Moix sagðist einnig vera mest fyrir asískar konur og þá sérstaklega konur frá Kóreu, Kína og Japan. Þær þyrftu þó að vera tiltölulega vel efnaðar til að hann færi út með þeim, án þess að skammast sín.



Ummæli Moix voru harðlega gagnrýnd í Frakklandi og víðar. Fréttakonan og rithöfundurinn birti Colombe Schneck birti mynd af afturenda sínum á Instagram þar sem hún sagði: „Gjörðu svo vel. Rass 52 ára konu. Þvílíkt fífl sem þú ert. Þú veist ekki hverju þú ert að missa af.“ Hún eyddi svo myndinni.

Þrátt fyrir gagnrýnina segist Moix ekki sjá eftir ummælunum og ekki sé honum um að kenna. Þess í stað sé hann í raun fangi eigin langana. Hann elski þá sem hann vilji og þurfi ekki að svara fyrir eigin smekk.



„Allir eru fangar eigin langana. Ég er fangi minna. Það kemur engan veginn niður á fimmtugri konu að ég vilji ekki sænga hjá henni,“ sagði Moix.

Hann bætti við að konur á hans aldri hefðu þar að auki engan áhuga á honum. Hann væri í rauninni bara barn og þær hefðu betri hluti að gera en að draga taugaveiklaðan mann eins og hann á eftir sér.