Gekk fram á innbrotsþjóf á tíundu hæð

Íbúi í austurhluta borgarinnar gekk fram á innbrotsþjóf, í þann mund sem hann ætlaði sér að yfirgefa íbúð hans með poka fullan af þýfi. Lögreglan segir að þegar íbúinn hafi komið heim til sín á níunda tímanum í gærkvöldi hafi hann séð að búið var að spenna upp útidyrahurð íbúðarinnar.

Þegar húsráðandi nálgaðist dyrnar er þjófurinn sagður hafa yfirgefið íbúðina, sem er á 10. hæð, með fullan poka af hvers kyns verðmætum. Honum hafi tekist að hlaupa á brott með pokann en ekki er að sjá af skeyti lögreglunnar í morgun að vitað sé um hvaða þjóf ræðir. Ætla má þó að málið sé til rannsóknar.

Fleiri mál komu inn á borð lögreglunnar í nótt. Til að mynda var óskað aðstoðar eftir að brothljóð heyrðust í miðborginni. Þar reyndist ölvaður maður hafa brotið rúðu og er hann sagður hafa skorist á hendi. Maðurinn var fluttur með sjúkrabifreið á slysadeild til aðhlynningar og segist lögreglan gera ráð fyrir að hann verði að því loknu fluttur í fangageymslu. Maðurinn sé útlenskur og að ekki sé vitað hvar hann gistir.

Þá var töluverður fjöldi ökumanna stöðvaður í nótt vegna gruns að þeir ækju undir áhrifum áfengis eða annarra vímuefna. Einn ökumannanna reyndist þar að auki vera eftirlýstur „vegna rannsóknar máls“ og fékk hann að verja nóttinni í fangaklefa.