Leti í starfi

Þeir fóru mikinn sérfræðingarnir, Jón Halldór Eðvaldsson og Fannar Ólafsson, á Stöð 2 sport nú nýlega, þegar þeir opinberuðu vanþekkingu sína á hinum ýmsu málum ótengdu því sporti sem þeir gefa sig út fyrir að vera sérfræðingar í.

Vitundarvakning

Ég ætla hér aðeins að tæpa á því sem snýr beint að mér og þeirri starfsstétt sem ég tilheyri. Ég er sjúkraflutningamaður og hef starfað í bráðaþjónustu utan spítala í tæp 18 ár, á þessum tæpu 18 árum hefur átt sér stað mikil vitundarvakning hvað varðar áfallastreitu, stress, álag í starfi og kulnun, nei afsakið, leti.

Það þykir ekki tiltökumál í dag að viðbragðsaðilar leiti sér aðstoðar sálfræðinga eftir erfið útköll eða áföll, enda mikil vinna verið lögð í að gera þá aðstoð sjálfsagða og eðlilegt framhald af úrvinnslu erfiðra mála. Hér áður fyrr þótti það til merkis um aumingjaskap, jafnvel leti, að viðurkenna að þurfa hjálp við úrvinnslu slíkra mála.

Á þessum tæpu 18 árum mínum í starfi sjúkraflutningamanns í bráðaþjónustu utan spítala hef ég orðið vitni að því þegar menn „krassa" í starfi og það er ömurlegt að verða vitni að slíku, hvað þá að verða fyrir því. Yfirleitt er það þannig að viðkomandi, sem fer að finna fyrir kulnun, nei ég meina auðvitað leti, reynir að fela það eins lengi og unnt er. Viðkomandi fer að taka út fleiri og fleiri veikindadaga, verður skapstyggur, fer jafnvel að drekka ótæpilega af áfengi, sefur illa og skapgerðarbrestir fara að koma í ljós.

Pissukeppni

Ef ekki er gripið inn í þetta ferli snemma fer illa, ég hef séð það gerast og það er ekkert gamanmál.

En aftur að ykkur sérfræðingunum. Það verður sennilega að skrifa þennan kjánaskap í ykkur á þekkingarleysi og athyglissýki og að öllum líkindum keppnisskap, því engu var líkara en þið væruð í pissukeppni um hvor ykkar gæti pissað lengur og meira. Þetta var svona , pabbi minn er sterkari en pabbi þinn, móment. Eitt skuluð þið þó vita, kulnun er dauðans alvara, en ekki leti. Þið ættuð að vera menn að meiru og biðjast afsökunar á óvönduðu orðfæri, vanþekkingu á málefninu og læra af mistökunum og skammast ykkar, réttast væri að leysa niður um ykkur og flengja duglega, ég er bara svo latur að ég nenni því ekki.

Höfundur er sjúkraflutningamaður.