Kjósa um mál á netinu sem gæti sprengt stjórnarsamstarfið

Ítalski stjórnarflokkurinn Fimm stjörnu hreyfingin stendur nú fyrir atkvæðagreiðslu á netinu meðal flokksmanna um mál sem gæti sprengt stjórnarsamstarfið.

Niðurstaða atkvæðagreiðslunnar mun ráða því hvort að öldungadeildarþingmenn flokksins muni koma í veg fyrir sakamálarannsókn á máli tengdu Matteo Salvini, innanríkisráðherra og leiðtoga Bandalagsins (Lega).

Fimm stjörnu hreyfingin og Bandalagið eru bæði í hópi þeirra flokka sem saman mynda meirihluta á ítalska þinginu. Hafa komið upp ýmis mál síðustu mánuði sem hafa valdið núningi í stjórnarsamstarfinu.

Sakaður um mannrán og valdníðslu

Salvini var í ágúst á síðasta ári sakaður um mannrán og valdníðslu þegar hann kom í veg fyrir að 150 flóttamenn um borð í ítölsku strandgæsluskipi fengu að ganga á land í fimm daga.

Rannsóknin var lögð niður en saksóknari á Sikiley vill nú að rannsóknin verði tekin upp að nýju. Salvini hefur beint því til dómsmálanefndar þingsins að stöðva málið.

Leiðtogar Fimm stjörnu hreyfingarinnar hafa í málflutningi sínum lagt mikla áherslu á að stjórnmálamenn skuli ekki skipta sér af réttarkerfinu. Þá hefur flokkurinn einnig lagt áherslu á mikilvægi beins lýðræðis þar sem kjósa skuli um mikilvæg mál í atkvæðagreiðslum, til dæmis á netinu.