Grunaður raðmorðingi handtekinn í Toronto: Faldi sundurlimuð lík í blómakerjum

Lögregla í Kanada rannsakar nú hvort að hinn 66 ára Bruce McArthur, sem hefur verið ákærður fyrir morðið á fimm mönnum, hafi fleiri mannslíf á samviskunni.

McArthur starfaði sem landslagsarkitekt í Toronto. Þrír af þeim fimm sem hann er ákærður fyrir að hafa myrt, voru reglulegir gestir í skemmtanalífi samkynhneigðra í borginni. Samfélag hinsegin fólks hafði á síðustu mánuðum vakið athygli á að fjöldi manna sem sóttu hverfið hafi horfið sporlaust. 

Lögregla í Toronto greindi frá ákærunni á hendur McArthur vegna morðanna á þeim Majeed Kayhan, Soroush Marmudi og Dean Lisowick í gær. Fyrr í mánuðinum hafði hann verið ákærður vegna morðanna á þeim Andrew Kinsman og Selim Esen.

Hinn 44 ára Esen hvarf í apríl síðastliðinn og hinn 49 ára Kinsman í júní. Kayhan, 58 ára, hvarf árið 2012, en allir voru þeir tíðir gestir á skemmtistöðum samkynhneigðra í Toronto.

Áttu í ástarsambandi

Fjölskylda hins fimmtuga Marmudi tilkynnti um hvarf hans árið 2015. Aldrei var sérstaklega tilkynnt um hvarf hins 47 ára Lisowick, en hann hafðist við í skýli fyrir heimilislausa og telur lögregla að hann hafi verið ráðinn bani milli maí 2016 og júlí 2017.

Lögregla segir að þeir Kinsman og Mr McArthur hafi átt í ástarsambandi, en hefur ekki greint frá tengslum hins grunaða við hina sem myrtir voru.

Lögregla segir að sundurlimuð lík þriggja manna hafi fundist í stórum blómakerjum á lóð McArthur. Í frétt BBC kemur fram að óljóst sé hvort að líkamsleifarnar séu af þeim sem þegar hafa verið nafngreindir af lögreglu. Á annan tug blómakerja á lóð McArthur hafa verið gerð upptæk af lögreglu, en nú stendur umfangsmikil leit þar yfir.