Marsspá Siggu Kling – Vogin: Þú átt að baða þig með þessari athyglisgleði

Elsku Vogin mín, það eru að koma svolítið jólin hjá ykkur Vogunum og þið eruð að taka upp pakka – sumir pakkarnir sem þið fáið eru að sjálfsögðu svolítil vonbrigði því þið bjuggust við einhverju öðru.

En allir þessir pakkar sem þið eruð að taka upp núna eru líkt og undirstöðuatriði eða múrsteinar að framtíðinni ykkar, þeir eru í öllum litum og gerðum og engin framtíð er rétt nema erfiðleikar séu partur af henni, svo lærðu betur að meta erfiðleikana því það eina sem gerir þig sterka eru akkúrat þeir.

Vertu með það alveg á hreinu hverjar skyldur þínar eru, eða hvort þú skuldir hinum eða þessum, athygli, greiða eða kannski pakka. Það er svo magnað þegar maður hættir að hugsa um sjálfan sig, tekur hausinn úr rassinum á þér og spáir í það hversu marga fylgjendur þú í raun og veru átt og elska þig.

Það sem þú gerir, gerir þú alltaf með brennandi orku, brennandi ás og allt sem þú vinnur að hefur þú brennandi áhuga á líka – það er engin meðalmanneskja fædd í Voginni og þó það geti verið erfitt að vera svo afgerandi persóna en um það snýst lífið. Þú átt að baða þig með þessari athyglisgleði, þú ert leiðtogi í vinnu, í skólanum eða með vinunum og þegar þér finnst eitthvað hafa stoppað þig hefurðu sjálf stoppað þennan brennandi eld.

Það er í eðli þínu að gefa meira en þú þiggur, en þú verður virkilega spæld ef það á að gerast ár eftir ár að ekki sé tekið eftir því því þá missirðu kraftinn. Þú ert mikill elskhugi, en að vera elskhugi snýst ekki bara um samfarir, heldur miklu meira tilfinningar og yfirleitt allt annað og frekar meira um nærveru með þeim sem þú elskar. Núna þarftu að skoða hvaða nærvera hentar þér, þú færð alla til að spila það lag sem þú vilt sé spilað, hvaða lag ertu að spila?

Þú hefur svo mikla ákefð gagnvart lífinu og það er að gefa þér ný tækifæri, og í þessum tækifærum þarftu að greina hvað er satt og rétt, ekki láta freista þín í einskis verða vitleysu eins og oft áður eða láta glepjast, heldur finndu rétta fókusinn á réttu hlutina. Ég ætla ekki að senda ykkur lagið Nei eða Já með Siggu Beinteins vegna þess að núna takið þið elskurnar réttar ákvarðanir og þær eru bara erfiðari en hinar auðveldu.

Það þarf mun meiri staðfestu til að taka sterkar ákvarðanir og standa og falla með þeim heldur en að vera eins og viljalaust strá í vindi sem er heldur alls ekki líkt þér hjartað mitt. Svo við förum úr einu í annað þá átt þú elskan mín eftir að vera í sviðsljósinu út af einhverju sem er skemmtilegt og þú ert líka að tengja nýtt fólk í líf þig sem gefur þér styrk og nýja sýn á allt og hvað viltu meira?

Setningin þín er, taktu einn dag í einu, eitt skref í einu – Unbroken (María Ólafs)