Skotum hleypt af ellefu sinnum á skólalóðum á árinu

Skotárásin í skóla í Benton í Kentucky í gær, þann 23. janúar, var í ellefta sinn sem skotum er hleypt af á lóðum skóla Bandaríkjanna á árinu. Um 50 slík atvik hafa átt sér stað á skólaárinu en í einhver skipti er um sjálfsmorð að ræða þar sem engan annan hefur sakað og í einhver skipti sakaði engan.

Samkvæmt frétt New York Times hafa rannsakendur skráð um það bil eitt atvik þar sem skotum er hleypt af á skólalóð á viku frá 2013.



Meðal annars er bent á þegar skotið var á skólarútu í Iowa, skotið á skólahús í Kaliforníu og sömuleiðis í Seattle. Þá var táningsstúlka skotin af bekkjarfélaga sínum í Texas.

„Við erum orðin algerlega ónæm fyrir þessum árásum og ég held að þær muni halda áfram,“ sagði Katherine W. Schweit, fyrrverandi starfsmaður Alríkislögreglu Bandaríkjanna, við New York Times. Hún hefur rannsakað um 160 skotárásir í Bandaríkjunum.

Samkvæmt rannsókninni sem hún kemur að hefur stór hluti skotárása sem þessum í Bandaríkjunum átt sér stað á lóðum skóla og ferð þeim fjölgandi.

Hættar að hneyskla

Shannon Watts, stofnandi samtakanna Mæður krefjast aðgerða, segir ástæðuna fyrir því að árásir sem þessar séu hættar að hneyksla megi rekja til fjöldamorðsins í Newton árið 2012. Þá voru 20 ung börn og sex kennarar myrtir.

Árásin í gær var sú versta hingað til og dóu tveir fimmtán ára nemendur og fjórtán særðust. Nokkrir aðrir slösuðust í óreiðunni sem skapaðist. Árásarmaðurinn var einnig fimmtán ára gamall og var hann handtekinn mótþróalaust eftir að hann kláraði allar byssukúlurnar í skammbyssu sinni.

Fimm eru enn í alvarlegu ástandi.