Þrír fluttir á sjúkrahús eftir slys á Suðurlandsvegi

Þrír voru fluttir á slysadeild eftir umferðarslys á gatnamótum Suðurlandsvegs og Vesturlandsvegs í morgun. Suðurlandsvegur var lokaður við Hádegismóa vegna slyssins en vegurinn hefur verið opnaður fyrir umferð á ný.

Samkvæmt upplýsingum frá slökkviliðinu á höfuðborgarsvæðinu skullu tveir bílar saman. Sem fyrr segir voru þrír fluttir á sjúkrahús og þar af var einn töluvert slasaður en hann er þó ekki talinn vera í lífshættu, en sjúkraflutningamenn þurftu að beita klippum til að ná honum úr annarri bifreiðinni.

Töluverðar tafir voru á umferð vegna slyssins.