Búast við vonskuveðri á gamlársdag

Gul viðvörun Veðurstofu Íslands er í gildi norðvestan- og norðanverðu landinu framan af degi á gamlársdag. Búist er við stormi við Breiðafjörð og miklu hríðarveðri á Vestfjörðum, Ströndum, Norðurlandi vestra og Norðurlandi eystra. Öllu hægara veður verður þó fyrir sunnan, þar með talið á höfuðborgarsvæðinu.

Á vef Veðurstofunnar er spáð norðan stormi eða roki 20-28 m/s á Breiðafirði. Búast má við mjög snörpum vindhviðum við fjöll, og allt að 30 m/s á norðanverðu Snæfellsnesi, í Dölunum og á Barðaströnd.  

Á Vestfjörðum er einnig spáð norðan stormi. Þá má búast við „mjög hvössum og varhugaverðum vindhviðum við fjöll“, að því er segir á vef Veðurstofunnar og gera má ráð fyrir staðbundnum hviðum yfir 35 m/s. Einnig er spáð talsverðri snjókomu og skafrenningi og er fólk hvatt til að vera ekki á ferðinni.

„Víðtækar samgöngutruflanir líklegar, lokanir á vegum og ekkert ferðaveður er á meðan viðvörunin er í gildi. Fólki bent á að sýna varkárni og fylgjast með veðurspám.“

Hið sama er uppi á teningnum á Norðurlandi vestra og eystra en þar er spáð norðan hvassviðri eða stormi og mjög hvössum vindstrengjum við fjöll. Einnig má búast við talsverðum éljagangi.

Gert er ráð fyrir að veður lægi með kvöldinu en eins og staðan er núna er gul viðvörun Veðurstofu aðeins í gildi framan af degi á gamlársdag. Þannig verður veður verst fram til klukkan 10 við Breiðafjörð og á Vestfjörðum, til 13:30 á Ströndum og Norðurlandi Vestra og til klukkan 16 á Norðurlandi eystra.

Í dag hefur verið nokkuð hvasst um land allt en búist er við að dragi úr vindi og úrkomu í kvöld. Á morgun gengur í austan 10-18 m/s og hlýnar í veðri. Veðurstofan spáir jafnframt rigningu sunnanlands á morgun en snjókomu um landið norðanvert upp úr hádegi, sem síðar snýst upp í rigningu. Þá verður vaxandi suðlæg átt annað kvöld og styttir upp norðaustanlands.

Veðurhorfur á landinu næstu daga:

Á mánudag (gamlársdagur):

Norðan hvassviðri eða stormur með snjókomu um landið norðanvert, en yfirleitt hægari fyrir sunnan og slydda með köflum. Dregur ört úr vindi og ofankomu um kvöldið, fyrst vestantil. Hiti 0 til 5 stig S-lands, en vægt frost fyrir norðan. 

Á þriðjudag (nýársdagur):

Hæg breytileg átt, víða léttskýjað og kalt í veðri. Vaxandi suðaustanátt og þykknar upp S- og V-til þegar líður á daginn með rigningu um kvöldið og hlýnandi veðri. 

Á miðvikudag, fimmtudag og föstudag:

Suðlægar áttir og rigning S- og V-til, annars þurrt. Hiti 1 til 7 stig.