Innlent

Lögmaður þingmanna Miðflokksins sendi Persónuvernd erindi

Birgir Olgeirsson skrifar
Gunnar Bragi Sveinsson, Sigmundur Davíð Gunnlaugsson og Bergþór Ólason, þingmann Miðflokksins, sem sátu á Klaustur ásamt Önnu Kolbrúnu Árnadóttur.
Gunnar Bragi Sveinsson, Sigmundur Davíð Gunnlaugsson og Bergþór Ólason, þingmann Miðflokksins, sem sátu á Klaustur ásamt Önnu Kolbrúnu Árnadóttur. Vísir

Þingmenn Miðflokksins sem voru hljóðritaðir á barnum Klaustur í síðasta mánuði hafa ráðið sér lögmann sem krafðist þess að Persónuvernd tæki til rannsóknar hver hefði tekið þá upp.

Þetta kemur fram á vef Ríkisútvarpsins þar sem rætt er við forstjóra Persónuverndar, Helgu Þórisdóttur.

Þar segir jafnframt að rúmum sólarhring eftir að erindið barst Persónuvernd hafi Bára Halldórsdóttir stigið fram í viðtali við Stundina þar sem hún játaði að hafa tekið upp samtal þingmanna Miðflokksins og Flokks fólksins.

Helga segir Persónuvernd hafa svarað lögmanni þingmanna Miðflokksins að nú liggi fyrir hver tók samræðurnar upp og var óskað eftir svari frá lögmanninum hvort enn væri farið fram á umfjöllun Persónuverndar um málið og hvort sé farið fram á að hún beiti valdheimildum sínum og þá hverjum.

Í frétt Ríkisútvarpsins segir að fjögur erindi hafi borist Persónuvernd frá almenningi þar sem spurt er hvort stofnunin ætli að beita sér í málinu eða gerðar almennar athugasemdir um umræðuna á Klausturbar. Haft er eftir Helgu Þórisdóttur að ekki sé komið á hreint hvort Persónuvernd muni taka upptökuna formlega fyrir en hún verði rædd á fundir stjórnar Persónuverndar í lok næstu viku.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.