Skíta­dreifarinn ýtti dráttar­vélinni út af Krýsu­víkur­vegi

Ökumaður missti vald á dráttarvél sem hann ók eftir Krýsuvíkurvegi í gær með þeim afleiðingum að hún fór út af veginum.

Í tilkynningu frá lögreglunni á Suðurnesjum segir að aftan í dráttarvélinni hafi verið stór skítadreifari sem ýtti henni út af veginum. Ökumaðurinn slapp án meiðsla en tækin voru stórskemmd eftir óhappið.

„Annar ökumaður ók bifreið sinni yfir umferðarmerki og á ljósastaur á Reykjanesbraut. Hann slapp án meiri háttar meiðsla. Þegar lögregla ræddi við hann viðurkenndi hann neyslu áfengis og fíkniefna.

Þá hefur lögreglan á Suðurnesjum kært sex ökumenn fyrir of hraðan akstur á undanförnum dögum. Fimm voru teknir úr umferð vegna gruns um vímuefnaakstur og  þrír óku án ökuréttinda,“ segir í tilkynningunni.