Ívar valdi tvo nýliða fyrir nóvemberleiki stelpnanna

Ívar Ásgrímsson, þjálfari íslenska kvennalandsliðsins í körfubolta, valdi fjórtán leikmenn í hóp sinn fyrir tvo síðustu leikina í undankeppni EM 2019.

Leikirnir verða á móti Slóvakíu og Bosníu en þeir fara báðir fram í Laugardalshöllinni seinna í þessum mánuði.

Helena Sverrisdóttir kemur heim frá Ungverjalandi til þess að spila þessa tvo leiki en hún leikur sem atvinnumaður með liði CEKK Cegléd. Hildur Björg Kjartansdóttir kemur einnig heim til Íslands en hún spilar með Celta de Vigo á Spáni. Aðrir leikmenn spila í deildinni hér heima.

Í æfingahóp landsliðsins eru tveir nýliðar þær Bríet Sif Hinriksdóttir úr Stjörnunni og Sigrún Björg Ólafsdóttir úr Haukum. Sigrún Björg Ólafsdóttir er fædd árið 2001 en hún er dóttir Ólafs Rafnssonar fyrrum formanns KKÍ og forseta FIBA Europe.

Tvíburasystir Bríetar er Sara Rún Hinriksdóttir sem hefur leikið 12 leiki fyrir Ísland en er nú við nám í Bandaríkjunum og kemst ekki í þessa leiki.

Liðið hefur æfingar eftir helgi og undirbýr sig fyrir síðustu tvo leiki landsliðsins í undankeppni EuroBasket Women 2019, en lokamótið fer fram næsta sumar í Lettlandi og Serbíu.

Ísland mætir Slóvakíu laugardaginn 17. nóvember kl. 16:00 og Bosníu miðvikudaginn 21. nóvember kl. 19.45 en báðir leikirnir fara fram í Laugardalshöllinni.



Íslenski landsliðshópurinn lítur þannig út:

(Leikstöður samkvæmt fréttatilkynningu KKÍ)

Bakverðir:

Briet Sif Hinriksdóttir, Stjarnan

Embla Kristínardóttir, Keflavík

Guðbjörg Sverrisdóttir, Valur

Hallveig Jónsdóttir, Valur

Sigrún Björg Ólafsdóttir, Haukar

Sóllilja Bjarnadóttir, Breiðablik

Þóra Kristín Jónsdóttir, Haukar

Framherjar:

Berglind Gunnarsdóttir, Snæfell

Gunnhildur Gunnarsdóttir, Snæfel

Helena Sverrisdóttir, CEKK Cegléd

Hildur Björg Kjartansdóttir, Celta de Vigo

Sigrún Sjöfn Ámundardóttir, Skallagrímur

Miðherjar:

Birna Valgerður Benýsdóttir, Keflavík

Ragnheiður Benónísdóttir, Stjarnan