Arnór markahæstur í tapi

Íslenski landsliðsmaðurinn Arnór Þór Gunnarsson heldur uppteknum hætti í markaskorun í þýsku úrvalsdeildinni en hann fór mikinn í liði Bergischer sem sótti Melsungen heim í dag.

Arnór skoraði sex mörk úr sjö skotum og var markahæstur en það dugði þó ekki til sigurs.

Melsungen vann leikinn með þremur mörkum, 26-23, eftir að hafa leitt með þremur mörkum í leikhléi, 13-10.

Arnór Þór er í landsliðshópnum og verður í eldlínunni þegar Ísland leikur gegn Grikklandi og Tyrklandi í næstu viku.